Գրեթե մեկ ամիս է անցել թուրքական ու ադրբեջանական համատեղ զորքերի՝ գումարած ահաբեկիչներին, ընդհանուր բանակի գրոհից, և մինչ օրս բլից հաջողությունների հասնելւ երևակայականը չի իրականացել՝ շնորհիվ մեր զինվորների սխրանքների, ինչպես նաև՝ ճիշտ ռազմավարության: Այս մասին հոկտեմբերի 23-ին ՛՛Տեսակետ՛՛ ակումբի կազմակերպած ասուլիսի ժամանակ ասաց ՛՛Արծիվ մահապարտների՛՛ ՀԿ ղեկավար, գեներալ-մայոր Աստվածատուր Պետրոսյանը՝ անդրադառնալով պատերազմական իրադրությանն ու իրավիճակին ռազմաճակատում:
Նա նշեց, որ ոչ մի հումանիտար հրադադար չի գործում, այլ գործում է միայն թուրք-ադրբեջանական դաշինքը՝ գումարած իսրայելական դաշնակիցները: ՛՛Թե՛ ուկրաինացի, թե՛ հրեա ժողովուրդները ոչ մի կապ չունեն իրենց ղեկավարների ծնկաչոք ման գալու հմտության հետ: Ժողովուրդը պարտադրված է մասնակցում որևէ գործողության, իսկ մեր ազգահավաք և այսօրվա դրությամբ միասնական ժողովուրդը մեծ գործ ունի անելու՝ ունենալով այս դառը փորձը, ունենալով 19-20 տարեկանների զոհողությունների գնով պաշտպանած սահմանների համար թափած արդար արյունը: Եթե մենք չամրացնենք հավատը, չենք կարող ոչինչ անել՛՛,-ասաց Պետրոսյանը:
Գեներալ-մայորն անդրադարձավ նաև այս պատերազմին իրենց՝ արծիվ մահապարտների մասնակցությանը՝ նշելով. ՛՛Այսօր մենք՝ արծիվ մահապարտներս, որ կռել ենք 1992-94 թթ., չենք կարող անտարբեր անցնել, մի հատված է տված, այդտեղ կատարել ենք մեր գործողությունները, այսօր էլ միայն մի ուղղությամբ գնացած 100 մահապարտների գումարտակը տվել է 5 զոհ ու երեք անհայտ կորած, և հիմա հակառակորդի տարածքում են գտնվում, Մարտիրոսյան Մարտինը, Աղջոյան Մխիթարը, Նազարյան Ավետիսը, Մադոյան Կարենը, Հովսեփյան Ռուբենը անհայտ կորած են համարվում, չենք կարողացել գտնել, այնտեղ կան մեզ հետ մարտնչած կամավորներ ու երկրապահներ… 32 հոգի ծանր վիրավոր, 4 հոգի, որ հիմա բուժվում են տարբեր հիվանդանոցներում, մեկն էլ փախել էր հիվանդանոցից, որ գնար առաջնագիծ, որտեղ իր որդին է կռվում… Առաջնագիծ ու հետնագիծ հասկացություն չկա, չկա մի ընտանիք, որ չունենա կորուստ, մեր ընտանիքում կորցրել ենք արդեն երեք զինվոր ու երկու հրամանատար, որոնցից մեկը Վահագն է Ասատրյան՝ քրոջս տղան, որ ազգային հերոսի կոչում ստավաց, Հովսեփյան Ռուբենի թոռներից մեկն այնտեղ զոհվել է…՛՛:
Ասուլիսին ներկա էր նաև գնդապետ, Կին ազատամարտիկների միության ղեկավար Աիդա Սերոբյանը, որը նոր է վերադարձել Արցախից և վաղը առավոտյան կրկին մեկնելու է մարտադաշտ: ՛՛Կասկած չկա՝ հաղթելու ենք, ես նոր եմ վերադարձել, մեր տղաների տրամադրությունը բարձր է, բոլորն էլ գիտեն,, որ հաղթելու ենք, ուզում եմ դիմել մեր հայրենակիցներին, որ խուճապի չմատնվեն, բոլորի մարտական ոգին բարձր է, բոլորս տրամադրված ենք, որ հաղթելու ենք, սա 90-ականների պատերազմը չէ, վճռվում է ոչ թե Արցախի, այլ հայի լինել-չլինելու հարցը: Ուզում եմ կոչ անել մեր հայրենակիցներին, որ 55-60 տարեկան՝ դատարկ բաներ են, ովքեր ի վիճակի են զենք վերցնել, պարտավոր են գալ, զենք վերցնել ու պահել մեր հայրենիքը, այդքան արյուն ենք հեղել, հո չե՞նք կարող թողնել, որ այդ ամենն իզուր անցնի, ինչպե՞ս ենք Եռաբլուր գալու, ի՞նչ պատասխան ենք տալու: Երբ հայը համախմբվում է, անգամ սիրիացի բաշիբոզուկներն են զենքը գցում՛՛,-ասաց Աիդա Սերոբյանը:
Աստվածատուր Պետրոսյանն էլ անդրադարձավ մեր մարտավարությանը, նշեց, որ այս նոր պատերազմը 5-րդ սերնդի պատերազմ է. ՛՛Եթե սկզբում մտածում էինք, թե ԱԹՍ-ները պիտի մի քանի խնդիր լուծեն, նկարեն, այսօր պատկերացրեցինք, որ միացավ Թուրքիան, որն ամբողջ կազմով կռվում է մեր դեմ: Պատերազմի ամբողջ ղեկավարումը Ադրբեջանից վերցված է իրենց վրա, թուրքական բանակն ունի միլիոն ու կես զորք, մեր սահմանի վրա ունի տեղակայած երեք բանակ, բայց մերը թեթևացրած բանակ է, իրենցը՝ ծանր, մենք ունենք մի բանակ, իրենք՝ երեք, երբ կա հակահարված, մենք չենք օգտագործում ստրատեգիական զենքերը, բայց իրենք օգտագործում են, եթե այդ ամենը հաշվի ենք առնում, տեսնում ենք, որ մերոնք տասնյակ անգամ ավելի զոհեր են պատճառել իրենց: Այս փուլում բանակցություններն ավելորդ են, բոլոր փուլերում էլ կգնանք, բայց ինչի՞ համար, երբ արդեն հաղթել ենք, մենք հաղթողի դիրքերից պիտի կապիտուլյացիա թելադրենք, մենք երգելով ենք գնում, սիրով ենք գնում, մենք իրենց ասում ենք՝ ձեր զենքերը դատապարտված են կործանման՛՛:
Գեներալ-մայորը նաև հանդես եկավ կոչով՝ ուղղված բոլոր նրանց, ովքեր ընդունակ են զենք վերցնել: ՛՛Տարիքային սահմանափակում չկա, վիրավորներն էլ են վեր կենում-գնում, ես կոչ եմ անում ժողովրդին՝ փորձառուները, ամենահատուկ պատրաստվածություն անցածները, ամենալավ մտային, սրտի ու հոգու հարստություն ունեցողները… բոլորն առաջնակարգ դիրքերում են, մենք պետք է միավորվենք համայն հայության հետ և ոչ միայն, այսօր կամավորներ են գալիս ՌԴ-ից՝ Մոսկվայից, ոնց որ կազակներն այն ժամանակ, եկել են՝ արդարամիտ բանակի հետ պայքարելու՝ վերջացնելու նրանց հարցը, ոչ թե հումանիտար օգնություն ցուցաբերելու, այլ հարկարվոր է ևս մի ցնցում, ևս մի առաջացում և…
Ովքեր ունեն գիտելիքներ, փորձ, հմտություն, կարողություններ՝ մտավոր ու ֆիզիկական, թող գան ու զինվորագրվեն, մենք մեր կռիվը մինչև վերջ տալու ենք և հաղթելու ենք, թող գան զինվորագրվեն այստեղ, համարները մենք կգրենք, մեզ մոտ արդեն զինվորագրվել են, երկու գումարտակ գնացել են, մեր միլիոնատերերի կարիքն էլ ունենք, ես երեկ ասացի, որ ինձ հարկավոր է ոչ միայն հիմնադրամի հավաքած 130 միլիոնը, այլև հայրենիքին հարկավոր է, որ ինչպես Էրդողանն է ստորագրում, ահաբեկիչներն են ստորագրում ԱԹՍ-ների ու օդանավերի վրա, այնպես էլ մեզ հարկավոր են օդանավեր, որ դրանց վրա գրվեն՝ Քիմ Քարդաշյան, Սամվել Կարապետյան… Երեք-չորս ՛՛՛Պանցիր՛՛ է պետք մեզ, այսօր դաշինք ունենք, հույներից սկսած՝ գալիս են մեզ հետ կռվելու, Կ. Պոլսի կողմից էլ պիտի գան, դաշինքները որ կնքել ենք, չպիտի մնան թղթի վրա… Մեզ հակաօդային պաշտպանության միջոցներ են պետք, ԱԹՍ-ներ, մեր ԳՇ-ն, մեր բանակը պատրաստ են…՛՛,-ասաց Պետրոսյանը:
Նա հորդորեց նաև չգործածել ՛՛զոհվել հանուն հայրենիքի՛՛ արտահայտությունը. ՛՛Վազգենը որ կենդանի լիներ, կասեր՝ այդ ի՛նչ ցեղասպանություն է, ինչ բան, մի՛ ասեք՝ գնում ենք զոհվելու, ո՛չ, գնում ենք ապրելու, մենք աստվածային ազգ ենք, ի՞նչ զոհվել, մենք պետք է ավելի բազմանանք, մենք պետք է ապրելով կերտենք մեր հաղթանակը՛՛:
Մանրամասները՝ տեսանյութում.