Ֆրանսիայի Սարսել քաղաքի «Հայաստանի այգում» տեղադրված Հայոց ցեղասպանության զոհերին նվիրված հուշատախտակը կոտրել են։ Այս մասին գրել է Ֆրանսիայի Ազգային ժողովի պատգամավոր Ֆրանսուա Պուպոնին։
«Ցավով տեղեկացա, որ կոտրվել է Սարսելում Հայոց ցեղասպանության զոհերի հիշատակը հավերժացնող տախտակը, որը պատիվ եմ ունեցել բացել 2015-ին: Գնացի այնտեղ, տեսա, որ հայերի հուշատախտակի երկրորդ շարքը շրջվել է:
Հայ ժողովուրդը մեր աջակցության կարիքն ունի առավել քան երբևէ: Հայերը շարունակում են պայքարել ադրբեջանական գրոհների դեմ: Այս մարդիկ արժանի են խաղաղ ապրելու:
Երանի այս արարքը վանդալիզմի գործողություն չլիներ, և ես խնդրում եմ քաղաքապետարանին լույս սփռել այս խնդրի վրա»,-գրել է Պուպոնին: