Լեռնային Ղարաբաղում ռուս խաղաղապահների գործառույթները, այդ թվում` նաև մշակութային ու կրոնական օբյեկտների պաշտպանության հարցերը, դեռ պետք է հստակեցվեն։ Այս մասին, ինչպես գրում է ՏԱՍՍ գործակալությունը, լրագրողների հետ հանդիպման ժամանակ ասել է ՌԴ նախագահի մամուլի քարտուղար Դմիտրի Պեսկովը։
«Խոսքը խաղաղապահ զորակազմի մասին է։ Գործառույթները, բնականաբար, դեռ պետք է հստակեցվեն, քանի որ դրանք նշված չէին երկու նախագահների ու Հայաստանի վարչապետի համատեղ հայտարարության մեջ», – ասել է Պեսկովը՝ հավելելով, որ չեն եղել նաև խոսակցություններ այն մասին, որ ռուս խաղաղապահները պետք է պաշտպանեն նաև տարածաշրջանում մշակութային ու կրոնական օբյեկտները։ ՌԴ նախագահի մամուլի քարտուղարի խոսքով՝ ինքը չի կարող ասել՝ կմտնի դա խաղաղապահների պարտականությունների մեջ, թե ոչ։
Ընդ որում՝ Կրեմլի ներկայացուցիչը հավելել է, որ ելնելով խաղաղապահ զորակազմի հիմնական գործառույթներից՝ ռուս զինվորականները «կապահովեն հրադադարի ռեժիմի պահպանումն որ բոլոր ռազմական գործողությունների դադարեցումը»:
Նա նշել է, որ Լաչինի միջանցքում ևս կտեղակայվեն ռուս խաղաղապահներ և «ըստ այդմ՝ կապահովվեն այս մայրուղու գործառույթները: Այլ նրբությունները դեռ պետք է հստակեցվեն»։
Պեսկովը նաև հերթական անգամ ընդգծել է, որ Լեռնային Ղարաբաղում ռուս-թուրքական համատեղ խաղաղապահ զորակազմի տեղակայման մասին խոսք անգամ չկա։ Նրա խոսքով՝ «փոխգործակցության համատեղ տարածքը կլինի Ադրբեջանում»։
«Դա չի լինի Ղարաբաղում, և խոսքը մշտադիտարկման կենտրոնի մասին է», – ասել է նա։
Հարցին, թե որ դեպքերում են ռուս խաղաղապահներն իրավասու Լեռնային Ղարաբաղում զենք կիրառել, Պեսկովը հայտարարել է, որ չի կարող հստակ պատասխանել։
«Խաղաղապահները կոչված են արձանագրելու ու պահպանելու հրադադարի ռեժիմը», – նշել է նա՝ հիշեցնելով, որ ռուս խաղաղապահները զինված են որոշակի սարքավորումներով, ինչից էլ պետք է լինի ելակետը։
Հիշեցնենք, որ ավելի վաղ ՌԴ նախագահ Վլադիմիր Պուտինը հայտնել էր, որ նոյեմբերի 9-ին ՌԴ-ն, Ադրբեջանը և Հայաստանը Ղարաբաղում ռուս խաղաղապահների տեղակայման շուրջ պայմանավորվածություն են ձեռք բերել:
Իր հերթին, ՀՀ վարչապետ Նիկոլ Փաշինյանը հայտնել էր, որ Ռուսաստանի և Ադրբեջանի նախագահների հետ ղարաբաղյան պատերազմը ժամը 01:00-ից դադարեցնելու մասին հայտարարություն է ստորագրել:
«Հայտարարության տեքստը, որ արդեն հրապարակվել է, անասելի ցավոտ է անձամբ ինձ և մեր ժողովրդի համար: Այդ որոշումը կայացրել եմ ռազմական իրադրության խորը վերլուծության և այդ իրադրությանը ամենալավը տիրապետող մարդկանց գնահատականի արդյունքում: Նաև հիմնվելով այն համոզմունքի վրա, որ ստեղծված իրավիճակում սա հնարավոր ամենալավ հանգուցալուծումն է»,- ասել է նա: