Պատերազմի սկսվելուն պես բոլորս միահամուռ դարձանք, լծվեցինք Հայրենիքի փրկության սրբազան գործով: Հայաստան-Սփյուռք-Արցախ եռամիասնությունն էր դիմակայում նենգ թշնամուն, ամեն մեկը` յուրովի: Արցախյան հարցում Սփյուռքի աջակցությունը Հայրենիքին նշանակալի է եղել ինչպես պատերազմի ընթացքում, այնպես էլ այսօր` հետպատերազմյան շրջանում: Այն առ այսօր էլ շարունակում է հրատապ մնալ, քանի որ թիկունքում պատերազմը չի ավարտվել:
Թիկունքի աշխատանքներում իրենց մեծ ներդրումներն են ունեցել բազմաթիվ սփյուռքաբնակ հայեր, որոնցից մեկն էլ 20-ամյա ամերիկաբնակ հայուհի Հռիփսիմե Մկրտչյանն է, ով իր իսկ կողմից ստեղծած հագուստի բրենդի` «hripskiii» վաճառքից ստացած ողջ հասույթը ուղղեց դեպի պատերազմում զոհված, վիրավորված և անապահով ընտանիքների աջակցմանն ու իրենց առջև ծառացած օրհասական խնդիրների լուծմանը:
Տասնյակ ընտանիքների համար սնունդ ու խնամքի պարագաներ, գումարային փաթեթներ զոհվածների ընտանիքներին, առաջնային կարիքների բավարարում և այլն, ահա սա է եղել Հռիփսիմեի վերջին մեկ ամսվա օրակարգը:
Շուրջ 30-ից ավելի ընտանիքների օգնած հայուհին, դեռևս պատերազմի ընթացում կազմակերպել ու հավաքել էր մեծաքանակ գումար և նվիրաբերել «Հայաստան» համահայկական հիմնադրամին: Հռիփսիմեն չի հանձնվում, ավելին` հայրենանվեր հայուհին կազմում ու պատրաստում է նոր բարեգործական ծրագրեր և յուրովի պայքարում թիկունքում` հենք դառնալով բազմաթիվ անապահովներին ու կարիքավորներին:
Սարիկ Սևադա