ԵՊՀ ՈւԽ նախագահի տեղակալ Դավիթ Մաթևոսյանը ֆեյսբուքյան իր էջում գրել է. «Հասկանալի է, թե ինչու են ԱՄՆ-ի հակառակորդ գերտերությունները ուրախացել Վաշինգտոնում տեղի ունեցող իրադարձություններով։ Օրինակ, ՌԴ-ի համար սա հնարավորություն է նորովի արժեզրկելու արևմտյան ժողովրդավարությունը և առհասարակ Արմուտքը: Նրանք ռացիոնալ են իրենց շահերի սպասարկման տեղանկյունից:
Բայց դժվար է հասկանալ, թե ինչու են այդ իրադարձություններից ուրախացել հայերը, ովքեր երկու ամիս առաջ կորցրել են իրենց հայրենիքի 1/4-ը։ Սովորական մարդկանց խինդը գուցե մեկնաբանելի է. միշտ կա թուլանալու և լիցքաթափվելու ցանկություն։ Բայց անհասկանալի է այն քաղաքական-հասարակական գործիչների ուրախությունը, ովքեր մեկ շաբաթ առաջ խոսում էին հայրենիքի կորստից, իսկ հիմա զբաղվում են ֆեյսբուքյան թռոլինգով։
Առավել տհաճ է, երբ համաշխարհային իրադարձությունները մեկնաբանվում են խիստ տեղական դիսկուրսից բխող բառամթերքով՝ «Նիկոլ», «նախկին», «մարտի մեկ»: Տեղականը համաշխարհայինով մեկնաբանելու փոխարեն մենք աշխարհն ենք մեզնով չափում: Երբ նման գայթակղության եք տրվում, բացեք աշխարհի որևէ քարտեզ:
Նորմալ հասարակությունը այսօր կքննարկեր, թե Ամերիկայում տեղի ունեցողը ինչ հետևանքներ կարող է թողնել մեր պետության ու մեր հարևանների վրա։ Առաջին հայացքից իրար հետ կապ չունեն, բայց, օրինակ, կարող է չէ՞ ԱՄՆ-ում երկարաժամկետ անկայունացումը և նրա թուլացումը ուժային վակում ստեղծել աշխարհում, որից կարող են օգտվել նաև մեր թշնամիները։ Սրա փոխարեն մենք մի տեսակ վերևից նայելով ծաղրում ենք աշխարհի ամենահարուստ ու ուժեղ պետությանը՝ ինքներս լինելով աղքատ, անպաշտպան ու հայրենազրկված:
Իսկ, եթե ավելի ռադիկալ ճշմարտություն եք ուզում լսել, ապա սիրուն ու զարգացած երկրների իրադարձությունները մեզ պետք է քիչ հետաքրքրեն: Ռուսաստան, Կովկաս ու Մերձավոր Արևելք՝ սա է մեր հետաքրքրությունների աշխարհագրությունը: Եթե այլ կարծիքի եք, դարձյալ բացեք որևէ քարտեզ:
2021-ի հանրային քննարկումների ելակետը պետք է լինի հետևյալը՝ նայիր քարտեզին ու հայելուն, հետո նոր խոսիր»։
- Լրահոս
- Թրենդային