Հայաստանն արդեն երկու ամիս է իշխանություն չունի։ Հայաստանում քաոս է, անարխիա է, անիշխանություն է։ Այս մասին հրավիրված մամուլի ասուլիսին ասաց քաղտեխնոլոգ Կարեն Քոչարյանը։
«Չեմ ասում՝ ինչ-որ մեկի մոտ է այդ իշխանությունը։ Ցավոք սրտի՝ ոչ, որովհետև այսպես երկար ապրել չի կարելի։ Նիկոլ Փաշինյանը 2,5 տարվա մեջ ապացուցել է, որ որևէ հարց ՀՀ-ում չի կարողանում լուծել՝ սկսած քաղաքականից, անվտանգությունից, վերջացրած՝ տնտեսականից»,- նշեց նա։
Նրա խոսքով՝ իշխանությունը և իշխանության առաջին դեմքը, որն արթնանում է և չգիտի, թե ինչ տրամադրություն է ունենալու երեկոյան, մարդ է, որը չի կարողանում պայմանավորվել թե՛ երկրի ներսում բիզնեսմենների հետ, թե երկրից դուրս, թե Սփյուռքի հետ։ Քաղտեխնոլոգն ընդգծեց, որ վերջին 2,5 տարում որևէ աշխատանք չի արվել, ներդրում չի եղել և անգամ իրենց համար հաղթաթուղթ համարվող նախկինների թեման փուչիկ է, որևէ մեկի նկատմամբ չկա կայացված դատավճիռ։
Քոչարյանի խոսքով՝ Փաշինյանը և իր կառավարությունը կոմպետենտ չէ և այն, որ Նիկոլ Փաշինյանն աշխարհաքաղաքական բոլոր հարթակներում դուրս գրված ֆիգուր է, միանշանակ է և խնդիրն այն է, թե երբ և ինչ մեխանիզմներով դա պետք է լինի։
«Մարդը, որը գլուխ է գովում, որ ստացել է 80 տոկոս ձայն, իրավիճակ փոխվելուց հետո 80 տոկոսանոց լիդերը չի կարողանում փողոց դուրս գալ, չի կարողանում օդանավակայան գնալ՝ առանց ոստիկանների, ԱԱԾ աշխատակիցների։ Ես նման լիդեր չեմ պատկերացնում»,- նշեց նա։