ԱԱԾ նախկին տնօրեն Միքայել Համբարձումյանը կարծում է, որ Արցախը միլիարդավոր դոլարների դիմաց ծախելու հայտարարությունները լրջագույն հարց են ու խորը քննության առարկա պետք է դառնան։
Դեկտեմբերի 17-ին Միքայել Համբարձումյանն և մի խումբ սպաներ՝ տարածած հայտարարությամբ մտահոգիչ էին համարում ՀՀ և Ադրբեջանի ղեկավարների միջև եղած կապի արդյունքում միլիարդավոր դոլարների դիմաց Արցախի տարածքների հանձման շուրջ սակարկությունների վերաբերյալ սպրդված տեղեկատվությունը։ Մամուլում խոսում էին 5 միլիարդ դոլարի դիմաց Արցախը հանձնելու վերաբերյալ տեղեկատվությունը։
«Կան հրապարակումներ, թե դա որքանով է իրական, ես չեմ կարող ասել, չեմ առնչվել այդ պրոցեսների հետ։ Մենք գործ ունենք մի տվյալի հետ, որ ասում են՝ տևական ժամանակ կապ է եղել վարչապետի ու ադրբեջանական կողմի միջև։ Կապի արդյունքում քննարկվել է միլիարդավոր դոլարների դիմաց հարցի լուծմանը հասնելու տարբերակը, հետո քննարկումների ընթացքը, արդյունքը ոչ մեկ չգիտի, թե ինչ է տեղի ունեցել, մենք ունենք հետևանքը՝ այսօրվա իրավիճակը՝ պարտություն, հողերի կորուստ, ՀՀ սահմանների հետ կապված լուրջ խնդիրներ։ Այսինքն` մենք պետք է գտնենք պատճառահետևանքային կապը», – ասաց Միքայել Համբարձումյանը։
Նա ընդգծեց, թե վարչապետ Նիկոլ Փաշինյանը և այն պաշտոնատար անձինք, ովքեր առնչվել են այդ պրոցեսի հետ, պետք է բացատրություններ տան։
«Եթե համոզիչ բացատրություններ չտրվեն, հավատացեք, նույնիսկ ես, որ ասել եմ վարչապետը դավաճան չէ ու չի կարող լինել, իմ մեջ կասկածներ կլինեն», – ընդգծել է ԱԱԾ տնօրենի նախկին պաշտոնակատարը։
Իսկ ինչո՞ւ իրավապահները ոչինչ չեն անում, Համբարձումյանը նշեց՝ որքանով ինքը տեղյակ է՝ զբաղվում են այդ հարցով ու ուղղակի չեն կարող չանդրադառնալ այդ հարցին։
«Ընդ որում դա ոչ թե պետք է քողարկեն նախաքննական գաղտնիքի քողով, այլ անեն մաքսիմում հանրային եղանակով»։
Համբարձումյանը մեկ անգամ էլ նշեց, որ ինքը պատրաստ է որպես քննիչ աշխատել այդ ուղղությամբ։ Իսկ այն, որ վարչապետը չի հերքում այդ տեղեկությունը, նշեց, որ միայն հերքելով չէ, պետք է մանրամասն պարզաբանումներ տալ։