Մոսկովյան հանդիպման օրակարգի մասին հայտարարությունը նախապես սահմանել է, որ քննարկումներ կարող են ընթանալ ճանապարհների ապաշրջափակման մասին։ Քննարկումը ինչպես գերիների վերադարձի՝ այնպես էլ ճանապարհների ապաշրջափակման մասին է եղել։ Այս մասին լրագրողների հետ զրույցում ասաց «Իմ քայլը» խմբակցության ղեկավար Լիլիթ Մակունցը։
Մակունցն ընգծեց, որ բոլոր հարթակներով ջանքեր պետք է գործադրվեն հումանիտար հարցը լուծելու համար․
«Վարչապետը Մոսկվայում ճեպազրույցի ժամանակ երկու անգամ նշեց գերիների վերադարձի կարևորության մասին։ Հայտարարության տեքստը, որն ընդունվեց Մոսկվայում օրեր առաջ, որևէ առնչություն չունի և չի կարող ունենալ հումանիտար նպատակով առաջադրվող առաջնահերթ խնդիրների հետ, չպետք է կապել մեկը մյուսին»,-ասաց Մակունցը։
Ճեպազրույցի ժամանակ «Իմ քայլը» խմբակցության ղեկավարն ասաց, որ հունվարի 11-ի հայտարարությունը գործողությունների մտադրության մասին է, որի հետ կապված՝ վարչապետը նախապես նշել էր, որ եթե գերիների հարցը չլուծվի, դրա իրագործման մեխանիզմները դժվարություններ են առաջացնելու, ինչը, ըստ Մակունցի, վերահաստատվեց մոսկովյան այցի ժամանակ:
«Գերիների վերադարձի հարցը և դրա շուրջ աշխատանքները եղել են և կան մեր առաջնահերթությունը։ ԱԺ-ն՝ ԱԳՆ-ի հետ համագործակցությամբ, այդ աշխատանքներն անում են»,- նշեց պատգամավորը: