ԱՀ ԱԻՊԾ փրկարարները Քարինտակ գյուղում հայտնաբերել են քաղաքացիական, 58-ամյա կնոջ դին։ Այս մասին «Փաստինֆո»-ի հետ զրույցում տեղեկացրեց ԱԻՊԾ տեղեկատվության եւ հասարակայնության հետ կապերի բաժնի պետ Հունան Թադեւոսյանը։
«Ալվարդ Թովմասյանի մարմինը որոնողական խումբը գտել է տան այգում: Հարազատները ճանաչել են զոհված կնոջ ինքնությունը։ Նշանակվել է դատաբժշկական փորձաքննություն»,-ասաց Թադևոսյանը՝ հավելելով, որ հունվարի 13-ին որոնողական աշխատանքները իրականացվել են նաեւ Թալիշի, Հադրութի եւ Մատաղիսի ուղղություններով, որտեղ զոհվածների աճյուններ չեն հայտնաբերվել։
Այսօր որոնողական աշխատանքները դադարեցվել են ադրբեջանական կողմի պահանջով։
«Դա կապ չունի երեկ հակառակորդի կողմից հրադադարի ռեժիմի խախտման հետեւանքով Արցախում զինծառայողի վիրավորման դեպքի հետ։ Որոնումները պետք է լինեին Ջաբրայիլի եւ Հադրութի շրջաններում, բայց այդ տարածքներում ադրբեջանցիները աշխատանք էին իրականացնում՝ ամենայն հավանականությամբ շինարարական, եւ այդ պատճառով հնարավոր չէ եղել այսօր որոնումները շարունակել»,- նշեց Հունան Թադեւոսյանը՝ հավելելով, որ որոնողական աշխատանքները կշարունակվեն վաղը։
Մինչ օրս հայտնաբերված զոհված զինծառայողների եւ քաղաքացիական անձանց թիվը 1230 է: