Մենք գործ ունենք Թուրքիան Ադրբեջանին կապող ցամաքային միջանցքի մոտ 100-ամյա թուրքական երազանքի իրականացման նախափուլի հետ։ Այս մասին այսօր մամուլի ասուլիսի ժամանակ հայտարարեց իրանագետ Վարդան Ոսկանյանը։
«Եթե նախիջևանյան ճանապարհը կյանքի կոչվի, ապա ունենալու ենք զգալի ռիսկեր ու մարտահրավերներ։ Այդ համատեքստում Սյունիքի տարածաշրջանը կարող է կորցնել իր այն նշանակությունը, որն այժմ ունի և դառնալ լուսանցքային, ինչը ոչ միայն չի բխում ՀՀ-ի շահերից, այլև հակասության մեջ է գտնվում ՀՀ-ի ազգային ու պետական շահերի հետ»,-ասաց Վարդան Ոսկանյանը։
Իրանագետի խոսքով Թուրքիան Ադրբեջանին կապող այս միջանցքն Իրանն իր շահերի հետ հակասության մեջ է դիտարկում։ Եթե այդ միջանցքը սկսի աշխատել, ապա Իրանն Ադրբեջանի վրա կկորցնի իր ազդեցությունը․
«Մինչ այդ միջանցքի մասին խոսակցությունները, ստորագրված հայտարարությունը, Նախիջևանի և Ադրբեջանի միջև կապն իրականացվում էր իրանական ճանապարհով, ինչն Իրանին տալիս էր կարևոր գործիք՝ ազդելու Ադրբեջանի նույնիսկ ներքաղաքական կյանքում ընթացող գործընթացների վրա»,-նշեց իրանագետը։