Ներկայումս համաճարակային իրավիճակը Հայաստանում բավական կառավարելի շրջանակներում է։ Այս մասին այսօր լրագրողների հետ զրույցի ժամանակ ասաց ՀՀ առողջապահության նախարար Անահիտ Ավանեսյանը։
«Հնարավորինս փորձում ենք շարունակել մեղմ ձևով հակահամաճարակային միջոցառումներ իրականացնել։ Կարանտինի մասին որոշումը վերջերս փոխվեց և մի շարք սահմանափակումներ դուրս եկան»,-ասաց Անահիտ Ավանեսյանը, այնուհետև դիմելով լրագրողներին, նկատողություն արեց նրանց․
«Ցավոք սրտի ոչ մեկդ դիմակ չեք կրում, բայց կարանտինի որոշմամբ դիմակ կրելը պարտադիր է և անկախ նրանից, որ ոստիկանությունն ավելի մեղմ է մոտենում և տուգանքները չի կիրառում, կխնդրեի աչալուրջ լինել։ Լավ է, որ ունենք կառավարելի վիճակ, բայց լավ կլինի, որ այդ իրավիճակը պահպանելու համար ունենանք նաև հակահամաճարակային կանոններ»,-ասաց նախարարը։
Հարցին՝ քա՞նի զինծառայողի աճյուն է բժշկական փորձաքննության ենթարկվել, նրանցից քա՞նիսն են շարունակում մնալ չճանաչված, նախարարն ասաց, որ ընդհանուր առմամբ 3450 աճյուն է փորձաքննության ենթարկվել․ «Նույնականացման գործընթացը կրկնակի, եռակի անգամ արագացվել է։
ԴՆԹ նոր սարք ենք ձեռք բերել, որի շնորհիվ կարողացանք այս տեմպը բավական արագացնել։ Օրեկան փորձաքննություններ իրականացնում ենք, ունենում ենք նույնականացված միջինը 30 հոգու»,-նշեց նախարարը։