Ուզում եմ գոհունակություն հայտնել ԱԺ երեք խմբակցություններին, քանի որ իմ թեկնածության քննարկումն անցել է բարեկամական, ջերմ, մասնագիտական պայմաններում։ ԱԺ ամբիոնից այս մասին ասաց ԲԴԽ անդամի թեկնածու Գագիկ Ջհանգիրյանը։
«Տրվել են բազմաթիվ հարցեր՝ ինձ հաճելի, նաև ոչ այնքան «հաճելի»։ Նախնական քննարկումներն արդյունավետ եմ համարում»,-ասաց Գագիկ Ջհանգիրյանը։
Վերջինս նկատեց՝ ՀՀ Սահմանադրությամբ Բարձրագույն դատական խորհրդի հիմնական առաքելությունը դատարանների և դատավորների անկախության երաշխավորումն է։ Գագիկ Ջհանգիրյանի խոսքով այդ անկախությունը երաշխավորող մարմինն ինքը նախևառաջ պետք է անկախ լինի և գործի անկախ․ «Սահմանադրական մակարդակում հռչակվում է ԲԴԽ-ի անկախ պետական մարմին լինելու հանգամանքը։
ԲԴԽ անդամները, ընտրվելով թե՛ դատավորների ընդհանուր ժողովի, թե՛ ԱԺ-ի կողմից, հաշվետու չեն իրենց ընտրող մարմիններին և դրանով արդեն անկախ են։
ԲԴԽ բոլոր անդամները ՀՀ Վճռաբեկ դատարանի դատավորի աշխատավարձին համապատասխան վարձատրություն են ստանում, ինչը բավական բարձր է։ Ի տարբերություն ԲԴԽ-ի նախատիպը հանդիսացող նախորդ արդարադատության խորհուրդներին, որոնցում դատավոր անդամները ճնշող մեծամասնություն էին կազմում, գործող Սահմանադրությամբ ԲԴԽ-ում դատավոր անդամների և իրավաբանների պարիտետ է սահմանված։ Քանի որ ԲԴԽ որոշումների բացարձակ մեծամասնությունն ընդունվում է ձայների կեսից ավելիով, թե՛ դատավոր, թե՛ իրավաբան անդամներին միշտ անհրաժեշտ է լինում մյուս կեսի թեկուզ մեկ անդամի աջակցությունը, ինչը ԲԴԽ-ի որոշումների ներքին հակակշռման լուրջ մեխանիզմ է և վկայում է այն մասին, որ դատավորների հանրույթի խմբակային, կորպորատիվ շահերը միշտ հակակշռված և զսպված են»,-նշեց Գագիկ Ջհանգիրյանը։