«Շարժման առաջնորդների միջև խնդիրներ չկան»,- Արարատի մարզում բնակիչների հետ հանդիպումից առաջ լրագրողների հետ զրույցում ասաց վարչապետի միասնական թեկնածու Վազգեն Մանուկյանը՝ անդրադառնալով տեղեկություններին, թե ԲՀԿ-ն իրեն որպես վարչապետ չի ընդունում։ Մանուկյանն ասաց, որ տեղեկությունները հնարովի են։
Անկախ նրանից, թե այս պահին իշխանությունների օրակարգում հրաժարականի հարց կա, թե ոչ ու նոր դեսպանների նշանակման ֆոնին անգամ, Մանուկյանը կարծում է, որ միևնույնն է՝ իշխանությունների հրաժարական լինելու է։
«Չի կարող այդ մարդն ուղղակի այդտեղ մնալ, չենք թողնի»։
Մանուկյանը դրական է գնահատում մարզային այցելությունները, նշեց, որ շատ բան է սովորում քաղաքացիներից, նրանց հետ էլ կիսվում իր փորձով։
«Ես կարծում եմ, որ լայն շրջանակներըը ոչ լրիվ են տեղյակ՝ ինչ է կատարվել ու կամաց-կամաց են տեղեկանում։ Պատերազմը այնպիսի հետևանքներ թողեց բնակչության վրա, որ մարդիկ շոկից դեռ դուրս չեն եկել»։
Վարչեպետի թեկնածուն անդրադարձավ նաև Գյումրիում՝ իրենց ճանապարհը փակած քաղաքացիներին «բոմժ» անվանելու քննադատություններին։
«Ժողովրդի մեջ կան մարդիկ, որ Նիկոլին են պաշտպանում։ Ես կարծում եմ, որ այդ մարդկանց հետ լուրջ աշխատանք է պետք տանել ու բացատրել ինչը՝ ինչոց է։ Նրանք մեր քաղաքացիներն են։ Եվ կան քաղաքացիներ, որ բոլոր իշխանությունների ժամանակ շահից ելնելով խուժանություն են անում ընդդիմության դեմ։ Այդ մարդիկ էին հավաքված և ես նրանց անվանեցի այն, ինչ անվանեցի»։
«Հայրենիքի փրկության շարժման» անդամները, վարչապետի թեկնածու Վազգեն Մանուկյանի հետ Արարատի մարզում այս պահին հանդիպում են բնակիչներին։