Նիկոլ Փաշինյանի գլխավորությամբ մեկնարկել է Կառավարության հերթական նիստը: Նիստի օրակարգում ընդգրկված է 25 հարց, որից 21-ը չի զեկուցվում:
Նիստի մեկնարկին Նիկոլ Փաշինյանը տեղեկացրեց, որ ՀՀ քաղաքացիների մուտքը դեպի ՌԴ բացվում է փետրվարի 1-ից՝ Covid 19 բացասական թեստի հիման վրա:
«Նախորդ տարվանից ծավալվող նոր տիպի կորոնավիրուսի համավարակի հետ կապված ճամփորդության բազմաթիվ սահմանափակումներ էին առաջացել և, դեռ նախորդ տարվանից մեր բազմաթիվ հայրենակիցներ հարց էին բարձրացնում Ռուսաստանի հետ օդային հաղորդակցությունը վերականգնելու վերաբերյալ, որովհետև դա որոշակի սոցիալական կոմպոնենտ ունեցող հարց էր»,-այս մասին կառավարության նիստին ասաց Նիկոլ Փաշինյանը:
«Մենք նախորդ տարվանից Ռուսաստանի և ԵԱՏՄ մեր գործընկերների հետ աշխատում ենք այս թեմայի վրա և ունենք կոնկրետ արդյունք՝ մեկնարկում է «Ճամփորդիր առանց Covid 19 ծրագիրը», որի վերաբերյալ Հայաստանի և Ռուսաստանի կառավարությունները կայացրել են որոշումներ: Ծրագրի էությունը հետևյալն է՝ կորոնավիրուսի բացասական թեստի հիման վրա քաղաքացիները հնարավորություն կստանան օդային տրանսպորտով ճամփորդել դեպի ՌԴ»,-ասաց Փաշինյանը:
Վերջինս նաև տեղեկացրեց, որ ծրագիրն առայժմ մեկնարկում է փորձնական կարգով՝ մինչև մարտի 1-ը ներառյալ:
Առողջապահության նորանշանակ նախարար Անահիտ Ավանեսյանն էլ նշեց, որ քաղաքացիները կարող են իրենց հեռախոսի մեջ ներբեռնել «Ճամփորդում եմ առանց COVID-19–ի» հավելվածը, որտեղ նշված են այն լաբորատորիաները, որոնք ընգրկված են այդ ծրագրում։ Քաղաքացիները կարող են մոտենալ լաբորատորիա, հանձնել Covid-ի թեստը:
Թեստի արդյունքները QR կոդով ներբեռնվում է համապատասխան ծրագիր: Թեստի բացասական արդյունքի դեպքում կանաչում է ազատ տեղաշարժի պատուհանը և տվյալ անձը կարող է հատել սահմանը:
ԱՆ նախարարն ընդգծեց, որ թեստի արդյունքները կգործեն 72 ժամվա ընթացքում: