Արարատյան հայրապետական թեմի առաջնորդ Նավասարդ արքեպիսկոպոս Կճոյանն այսօր՝ հայկական բանակի օրվա առիթով, այցելել է Եռաբլուր զինվորական պանթեոն և հարգանքի տուրք մատուցել: Լրագրողների հետ զրույցում Սրբազանն ասել է, որ հայկական բանակի կողքին են, ու զինվորագրված են պաշտպանության առաքելությանը:
«Բանակը մեր խոնարհումն է, մեր հերոսությունն է։ Մենք բանակի կողքին ենք, նույնիսկ զինվորագրված ենք այդ առաքելությանը։ Սիրով ու խոնարհումով մեր քայլերն ուղղում ենք այստեղ, ցույց տալու մեր միասնությունը»,- ասաց Սրբազանը։
Լրագրողները հետաքրքրվեցին՝ ինչո՞ւ է հոգևոր դասը իշխանություններից առանձին ժամանում Եռաբլուր՝ խախտելով երկար տարիների ավանդույթը, Արքեպիսկոպոսը հայտարարեց, որ «Հայոց բանակի օրը նման քաղաքական հարցերին չի պատասխանելու»։
«Այս օրով ես քաղաքական հարցերին չեմ պատասխանում: Ինձ համար այս օրը մեծ և սուրբ խորհուրդ ունի»,-նույն կերպ պատասխանելով նաև «վարչապետի հրաժարականի պահանջի» մասին հարցին: