Սա լավ առիթ է՝ ցույց տալու համար, թե այսօր Կառավարության դեմ լրատվական ինչպիսի մանիպուլացիաներ են տեղի ունենում. Փաշինյանը ֆեսբուքյի ուղիղ եթերում պարզաբանեց ԱԺ ամբիոնից արված Շուշիի վերաբերյալ իր հայտարարությունը:
Հիշեցնենք, որ հունվարի 20-ին Ազգային Ժողովում Փաշինյանը հռետորական հարց էր հնչեցրել, թե արդյո՞ք Շուշին հայկական է, քանի որ մինչեւ հակամարտությունը սկսվելը նրա բնակչության 90 տոկոսից ավելին ադրբեջանցիներ են եղել:
«Վերջին շրջանի աղմկահարույց վերնագրերից մեկը, ինչպես գիտեք, այն մասին է, թե ես հայտարարել եմ՝ Շուշին հայկական քաղաք չէ: Ի՞նչ առիթով է խոսվել այդ մասին. խոսվել է հետևյալ առիթով, երբ Կառավարության հետ հարց ու պատասխանի ժամանակ ես արել եմ հետևյալ արտահայտությունը, մեջբերում եմ՝ «ընդհանրապես չի եղել քննարկման այնպիսի տարբերակ, ոչ միայն հիմա, այլ բանակցային գործընթացի ողջ ընթացքում, որ ադրբեջանցի փախստականները Շուշի չվերադառնան: Շուշին հակամարտությունից և ազատագրումից առաջ ունեցել է 90 և ավել տոկոս ադրբեջանական բնակչություն, այսինքն դուք ուզում եք ասել, որ 90 տոկոս և ավելի ադրբեջանցի բնակչություն ունեցող Շուշի քաղաքը հայակակա՞ն է իր այդ կարգավիճակով»,-ասաց Փաշինյանն ֆեսբուքի ուղիղ եթերում:
Նիկոլ Փաշինյանի խոսքով՝ այս արտահայտությունն օգտագործելով՝ ոմանք ասում են, թե ինքը պնդել է՝ Շուշին հայկական քաղաք չէ.
«Հիմա հարց՝ ինչու՞ եմ ես ԱԺ ամբիոնից այդ խոսակցությունը բացել, մի պարզ պատճառով, քանի որ պատգամավորը ինձ հարցրել էր ՝ Ռուսաստանի նախագահը ձեզ առաջարկել է շատ ավելի շահեկան պայմաններով կանգնեցնել պատերազմը , Շուշին մնալով մեր վերահսկողության ներքո, այսիքն ՝ հայկակա՞ն է իր այդ կարգավիճակով արտահայտությամբ, ես պատասխանել եմ պատգամավորի՝ Շուշին մնալով մեր վերահսկողության ներքո պատերազմը կանգնեցնելու պայմաններին»,-պարզաբանեց Փաշինյանը: