Մենք երկար ե՞նք շարունակելու արտահերթ նիստեր գումարել և դատական բարփոխումների կարկատաններով լցնել օրակարգը։ ԱԺ-ում այս մասին ասաց «Լուսավոր Հայաստան» խմբակցության պատգամավոր Անի Սամսոնյանը՝ դիմելով ՀՀ արդարադատության նախարար Ռուստամ Բադասյանին։
Նախարարը նշեց, որ կա դատական իրավական բարեփոխումների ռազմավարություն և իրենց ոլոր գործողությունները բխում են այդ ռազմավարության տրամաբանությունից․ «Ասել ենք, որ դատական համակարգի ծանրաբեռնվածությունը խնդիր է։ Մեծ խնդիր ունենք՝ բարձրացնելու հանրային վստահությունը դատական համակարգի նկատմամբ։ Եթե ավելի կոնցեպտուալ մոդել ունեք, առաջարկում եմ օրենսդրական նախաձեռնությամբ հանդես գալ և ներկայացնել այն, որ կարկատաններով չլինի, միանգամից կոնցեպտուալ բոլոր հարցերը լուծեք»,-նշեց Ռուստամ Բադասյանը։
Անի Սամսոնյանը նկատեց՝ եթե այդ նախագծերը բխեին ռազմավարության գործողություններից, ապա դրանք պետք է ավարտուն և համակարգված լինեին․ «Մեզ մոտ դա այդպես չէ։ Մենք անընդհատ զբաղվում ենք ինչ-որ բաներ փոփոխելով և ինձ մոտ տպավորություն է, որ այդ գործողությունները բխում են ոչ թե ռազմավարությունից, այլ դրանք բխում են օրինակ երկրում տեղի ունեցող քաղաքական գործընթացներից»,-նշեց պատգամավորը։
Ռուստամ Բադասյանն ասաց, որ բաց կներկայացնի նախագծի ընդունման նպատակները և այդտեղ որևէ գաղտնիք չկա։