Պատերազմական օրերին 8-9 պատգամավոր, որոնք Արցախ են գնացել, ստացել են օրապահիկներ, գործուղումայիններ։ Երբ մեր տղերքը զոհվում էին, վիրավորվում, սահման էին պահում, Աարարատ Միրզոյանը, Լուլուն, Հրաչ Հակոբյանը Ստեփանակերտի կենտրոնում ապահով մնում էին։ Այս մասին մամուլի ասուլիսի ժամանակ ասաց «Ճշմարտություն սերունդների համար» նախաձեռնության հիմնադիր, զոհված զինծառայողի հայր Գեղամ Նազարյանը։
«Ինձ համար շատ տարօրինակ է, որ Ստեփանակերտի կենտրոնը չի հրթիռակոծվում։ Մեր պետության իրավապահ մարմինները պետք է հատուկ քննության առարկա դարձնեն, թե ինչն է պատճառը եղել, որ թշնամին թիրախավորում է Շուշիի եկեղեցին, մշակույթի տունը, տարբեր բնակարաններ, ֆոսֆորային զենք է օգտագործում անտառները վառելու համար, բայց չգիտես ինչու գորովանք է ցուցաբերում Ստեփանակերտի կենտրոնի մի քանի շենքերի նկատմամբ։ Ինչու՞ չի հրթիռակոծվել Ստեփանակերտի կենտրոնը, դա պետք է ամենօրյա ուշադրության կենտրոնում լինի»,-նշեց Գեղամ Նազարյանը։
Վերջինս նկատեց՝ սա դառնալու է Նյուրնբերգյան դատավարությունը, որտեղ թիվ մեկ մեղադրյալները լինելու են Նիկոլը և Աննան։ Գեղամ Նազարյանն իրավապահ մարմիններին կոչ արեց երկրի սահմանները փակել այդ ընտանիքի առաջ․ «Աննա Հակոբյանը եղել է բունկերում՝ կառավարման կենտրոնում, ի՞նչ իմանանք, թե ինչ ինֆորմացիա է այնտեղից դուրս եկել։ Արցախում եղած քաղաքացիական անձանց, ելքային ու մուտքային զանգերը, հաղորդագրությունները պետք է վերծանվեն։ Ում են գրել, ինչ են գրել։ Հասկանում ենք չէ, որ բարոյական աջակցության մասին այդ անհասկանալի հայտարարությունն այդպես չէ իրականում։ Նրա այնտեղ գտնվելու հետևանքով մենք ունեցել ենք ծանրագույն կորուստներ»,-նշեց Գեղամ Նազարյանը։