Խորհրդարանում ԱԺ Պետաիրավական հարցերի մշտական հանձնաժողովի հերթական նիստում քննարկվում էր ՀՀ քրեական օրենսգրքում փոփոխություններ կատարելու մասին օրենքի նախագիծը։ Այն հեղինակել են ԲՀԿ-ական պատգամավորներ Վահէ Էնֆիաջյանը, Նաիրա Զոհրաբյանը և Իվետա Տոնոյանը։
Ներկայացնելով օրենքի նախագիծը՝ Վահե Էնֆիաջյանն ասաց, որ օրենքի նախագիծը վերաբերում է պետական դավաճանություն և լրտեսություն կատարած անձանց նկատմամբ պատժամիջոցները խստացնելուն։
«Պետական դավաճանությունը և լրտեսությունը չենք կարող այլ հանցանքների հետ համեմատել, որովհետև այն վնասները, որոնք թողնում են պետական դավաճանությունը և լրտեսությունը ՀՀ-ի և մեր ժողովրդի համար, համեմատությունների մեջ չի կարելի դնել։ Օրինակ՝ թշնամու կողմն անցնելը, օտարերկրյա կազմակերպություններին կամ անձանց պետական գաղտնիք հանձնելը, թշնամական գործունեություն իրականացնելու համար օգնություն ցույց տալը և այլն»,- ներկայացված նախագիծն այսպես հիմնավորեց Վ. Էնֆիաջյանը։
Նա նաև տեղեկացրեց, որ նախագիծը քննարկել են «Բարգավաճ Հայաստան» խմբակցության պատգամավորների հետ, գրություններ է ուղարկել ԵՊՀ-ի իրավաբաններին, Գիտությունների ազգային ակադեմիային, Փաստաբանների պալատին, ԱԱԾ, Ոստիկանություն՝ նրանց կարծիքն իմանալու համար։
«2020թ. սեպտեմբերի 27-ից սկսած՝ Ադրբեջանի կողմից Թուրքիայի ռազմաքաղաքական աջակցությամբ Արցախի Հանրապետության նկատմամբ սանձազերծված լայնածավալ ռազմական ագրեսիայի արդյունքում ի հայտ եկան պետական դավաճանության կամ լրտեսության դեպքեր՝ ի ցույց դնելով իրավական կարգավորումներում առկա բացերը:
Վերոնշյալ դեպքերը ցույց են տալիս, որ ներկայիս կարգավորումները չեն կանխարգելում պետական դավաճանության կամ լրտեսության իրականացումը, այդ իսկ պատճառով անհրաժեշտություն է առաջանում որպես կանխարգելող գործոն՝ սահմանել ՀՀ քրեական օրենսգրքով սահմանված խիստ պատժի չափը՝ քսան տարի ազատազրկում կամ ցմահ ազատազրկում։
ՀՀ 2003 թվականի ապրիլին «Պետական դավաճանության մասին» օրենքում» սահմանվում է պետական դավաճանության համար 10-15 տարի ազատազրկում, մենք առաջարկում ենք այն փոխարինել 20 տարով կամ ցմահ ազատազրկմամբ»,- հավելեց պատգամավորը:
Ընդմիջումից հետո հանձնաժողովի անդամները դրական եզրակացություն տվեցին օրենքի նախագծին։