ՀՀ փոխվարչապետ Տիգրան Ավինյանն ասաց, որ չկա նման բան, և ինքը տեղյակ չէ որևէ հուշագրի ստորագրման մասին։ ԱԺ-ում ճեպազրույցի ժամանակ այս մասին ասաց «Իմ քայլը» խմբակցության պատգամավոր Սիսակ Գաբրիելյանը՝ անդրադառնալով հայ-ադրբեջանական հուշագի վերաբերյալ լուրերին։
Ինչ վերաբերում է ՀՀ նախկին վարչապետ Հրանտ Բագրատյանի հայտարարությանը, որ ստորագրվել է հայ-ադրբեջանական հուշագիր, որտեղ նշված են որոշակի կոորդինատներ, սահմաններ, պատգամավորը լրագրողներին առաջարկեց գնալ իր աշխատասենյակ և նման բովանդակությամբ 300 փաստաթուղթ կազմեն․ «A4 ֆորմատի թղթի վրա համակարգչով հավաքած տեքստ է, որի մեջ ինչ ասես գրում են և դա տարածում են 100 տոկոսանոց ճշմարտություն։ Եթե այդպես է, եթե այդ աստիճանի է հասել մանիպուլյացիան, եկեք հենց հիմա գնանք իմ աշխատասենյակ, ձեր ուզած տեքստը գրենք այդ թվում ռուսերենով, անգլերենով, անգամ ադրբեջաներենով գրենք, որ X պաշտոնյան այսպիսի կապ ունի ու նման համաձայնության է եկել։ Դրանք թղթեր են և յուրաքանչյուր համակարգչից օգտվող, տեքստեր հավաքող կարող է գրել»,-ասաց պատգամավորը։
«Իմ քայլ»-ական պատգամավոր Հայկ Գևորգյանն էլ նշեց, որ Գորիս-Կապան հատվածում 21 կմ-ն անցնում է Հայաստանի միջազգայնորեն ճանաչված սահմաններից դուրս, այսինքն Ադրբեջանի տարածքով, բայց ոչ մի վայրկյան այդ ճանապարհը չի փակվել․ «Այնպես չէ, որ դա պետք է այս պահին չգիտեմ ինչ համաձայնագրերով լինի։ Դա պայմանավորվածությունների արդյունք է, որ այդ ճանապարհը պետք է գործի և գործում է։ Ոչ մի վայրկյան ադրբեջանցիների կողմից այդ ճանապարհը չի փակվել»,-նշեց Հայկ Գևորգյանը։
Հարցին՝ ստացվում է, որ Սյունիքում անհանգստացնող որևէ գործընթաց չկա՞, Սիսակ Գաբրիելյանը նշեց, որ միանշանակ այն, ինչ հիմա կատարվում է, Սյունիքում բնակիչների մոտ կարող է անհանգստություն առաջացնել, բայց ազատ տեղաշարժը որևէ կերպ չի սահմանափակվել։