Հանրապետության հյուսիս-արեւելյան ուղղությամբ, բարձունքում՝ 3100 մետրի վրա մարտական հերթապահություն են անցկացնում Քարվաճառը մինչեւ վերջ պաշտպանած տղաները: Այս մասին ներկայացված է ՊՆ-ի պատրաստած տեսանյութում:
Մայոր Խաչատրյանը, որն ամբողջ պատերազմի ընթացքում եղել է մեր ամենակարևոր բնագծերից մեկի՝ «Հովազ 1» դիրքի պատասխանատուն, վստահեցնում է, որ դիրքապահներն այսօր էլ ամուր կանգնած են սահմաններին:
«Անձնակազմը գտնվում է մարտական վիճակում, հերթապահությունն անցկացնում է բարձր մակարդակով, զորքի բարոյահոգեբանական վիճակը կայուն է»,-ասում է նա ։
Հայրենիքի այս հատվածի պատասխանատուները վստահեցնում են, որ հակառակորդն իրեն հանգիստ է պահում, բայց օրը 24 ժամ, ոչ մի վայրկյան իրենք զգոնությունը չեն թուլացնում:
«Պատերազմից հետո ավելի ոգեշնչված ենք ծառայում: Զգոն ենք եւ անառիկ ենք պահում մեր սահմանները»,-ասում է ժամկետային զինծառայող Սեւակ Նիկոյանը, որը Քարվաճառը պաշտպանած լավագույն զինվորներից է: Ասում է ՝ թշնամին բազմաթիվ փորձեր է ձեռնարկել իրենց սահմնագոտին ճեղքելու ուղղությամբ։ Նույնիսկ դիվերսիայի փորձ է արել «Հովազ-1» հենակետի ուղղությամբ, սակայն իրենք նրանց անակնկալի են բերել հենց մեր խրամատում:
«Մենք կյանքի գնով պահել ենք էդ պոստը: Ես ոչնչացրեցի նրանց երեք զինծառայողների»,-ասաց նա:
Հայկն էլ «Հովազ 3» մարտական հենակետում է եղել։ Մարտական ընկերներով հակառակորդի մեծաթիվ հրոսակախումբ են ոչնչացրել։ Վսահեցնում է՝ հիմա ավելի մեծ պատասխանատվությամբ են ծառայում։
Բոլորն են պատմում, որ Քարվաճառը կյանքի գնով են պահել, Օմարի համար կյանք չեն խնայել, կռվել են «ոչ մի քայլ հետ» սկզբունքով:
Հենակետերից մեկը դեռ մինչեւ վերջ կահավորված չէ, ինժեներական աշխատանքներ են տարվում, սակայն այստեղ մեր դիրքերը անհամամատ նպաստավոր են հակառակորդի համեմատ։ Մենք բարձունքում ենք, նրանք՝ ներքևում։
«Մենք որ այս դիրքերում կանգնած ենք, հաստատ ոչ մի վտանգավոր բան չի լինելու։ Զգոն ենք, ամուր ենք։ Դուք էլ կարող ենք հանգիստ քնել»,-վստահեցնում են մեր զինվորները։