Վերջին ամիսներին ինտենսիվ քննարկումներ ենք ունեցել զինված ուժերի բարեփոխումների թեմայով։ Ձևեակերպել ենք օրակարգ, թե ինչպես և ինչպիսի ձևաչափերում պետք է իրականացվի զինված ուժերի բարեփոխումը։ Այս մասին կառավարության նիստի մեկնարկին ասաց ՀՀ վարչապետ Նիկոլ Փաշինյանը։
«Այսօր մտադիր եմ ստորագրել ՀՀ պաշտպանության նախարարի գլխավորությամբ աշխատանքային խումբ ձևավորելու վերաբերյալ որոշում։ Աշխատանքային խումբը կիրականացնի զինված ուժերի բարեփոխումների, հայեցակարգի, ճանապարհային քարտեզի ժամանակացույցի ձևավորումը։ Այս գործընթացում մտադիր ենք էլ ավելի սերտ համագործակցություն հաստատել մեր անվտանգային թիվ մեկ գործընկերոջ՝ Ռուսաստանի Դաշնության հետ և համոզված ենք, որ այս գործընթացի արդյունքում այդ համագործակցությունը կդառնա ավելի արդյունավետ՝ անվտանգային ոլորտում, ռազմական համագործակցության ոլորտում և ռազմատեխնիկական համագործակցության ոլորտում»,-ասաց վարչապետը՝ հույս հայտնելով, որ մինչև ճանապարհային քարտեզի ամփոփման ամսաթիվը հայեցակարգային աշխատանքի առնվազն մեծ մասն իրականություն կդարձնեն։
Նիկոլ Փաշինյանն անդրադարձավ Աբու Դաբիում տեղի ունեցած ռազմատեխնիկական ցուցահանդեսի ժամանակ հայկական կողմի ցուցանմուշների տեղ հասնելու հետ կապված խնդիրներին։
«Նշանակել եմ ծառայողական քննություն, որի արդյունքներով պատասխանատուներն ի հայտ կբերվեն և պատասխանատվության կենթարկվեն, եթե պարզվի, որ մեր պաշտոնյաները որևէ անելիքի մեջ թերացել են»,-նշեց Նիկոլ Փաշինյանը։