Վարչապետի հրաժարականը պահանջող քաղաքացիները քայլերթով կանգ առան Կառավարական առաձնատան մոտ, որտեղ հարյուրավոր ոստիկաններ են բերվել։ Ոստիկանական մեծաքանակ ուժերը մի քանի շարքով փակել են առաձնատան մուտքը։
«Հայրենիքի փրկության շարժման» մասնակիցները Բաղրամյան պողոտայից երթով հասան Հանրապետության նախագահի նստավայր, պահանջեցին, որ ՀՀ նախագահը չտրվի վարչապետի շանտաժներին և հստակ ձևակերպի իր առարկությունը՝ Զինված ուժերի Գլխավոր շտաբի պետ Օնիկ Գասպարյանի ազատման մասին և փաստաթուղթն ուղարկի ՍԴ։
Նախագահի նստավայրից շարժան մասնակիցներին նախագահի ներկայացուցիչը հայտնել է, որ 15։40-ին Արմեն Սարգսյանը կընդունի պատվիրակությանը։
Շարժման մասնակիցները երթը շարունակեցին Պռոշյան փողոցով ու հասան Կառավարական ամառանոց, որտեղ բացականչում են «Առանց Նիկոլ հայաստան»։ Շարժման համակարգող Իշխան Սաղաթելյանն էլ դիմեց Նիկոլ Փաշինյանին.
«Նիկոլ, սրանից հետո չփորձես Հայաստանի քաղաքացուն ասես «կգանք հետևիցդ», հակառակ դեպքում էնպես կգանք հետևիցդ, կմտնես սեղանի տակ ու դուրս չես գա»։
Հայրենիքի փրկության շարժման երթը շարունակվում է։