Տարածված տեսանյութի հետ կապված ռազմական ոստիկանությունում նյութեր են նախապատրաստվում, իսկ Կապանի առաջնագծում որեւէ լուրջ մտահոգության կարիք կամ առիթ չկա: Այս մասին, այսօր՝ մարտի 15-ին, ԱԺ-ում լրագրողների հետ զրույցում նշեց պաշտպանության փոխնխարար Արման Սարգսյանը:
«Անվտանգային մասով որեւէ խնդիր չկա: Այս պահին ՊՆ-ն ու ԳՇ-ն ամեն ինչ անում են զինվորների վիճակը, իրենց պայմանները բարելավելու ուղղությամբ: Սրանք ընթացիկ աշխատանքներ են, որոնք իրականացվում են ամենօրյա ռեժիմով»,-ասաց փոխնախարարը:
Հարցին, թե արդյո՞ք Կապանում դիրք թողնելու հրաման եղել է, նա պատասխանեց, որ դիրք թողնելու մասին խոսք չկա:
Դիտարկմանը, որ միշտ պաշտոնապես հերքվում է, սակայն հետո պարզվում է, որ տարածված տեղեկությունները ճիշտ են, անգամ երրորդ փաստաթուղթ կա, փոխնախարարը նշել է, որ ստորագրվրած երրորդ փաստաթուղթը որեւէ մեկը չի տեսել. «Երրորդ փաստաթղթի մասին այս պահին որեւէ խոսք լինել չի կարող: Եթե լիներ, բնականաբար հանրությունը տեղյակ կլիներ դրա մասին»:
Սարգսյանը չհերքեց, որ բանակում կան խնդիրներ՝ միեւնույն ժամանակ նշելով, որ դրասնք լուծելու համար իրականացվում են ինտենսիվ քայլեր, իրականացվում են ամենօրյա աշխատանքներ, որպեսզի անվտանգային միջավայրն ավելի լավ լինի:
«Յուրաքանչյուր ոչ, ով կանի հայտարարություններ, որոնք կարող են պարունակել առերեւույթ հանցագործության, կամ բանակին վերաբերող հարցեր, այդ առնչությամբ պետք է իրականացվի ուսումնասիրություն եւ դա պետք է սկսել տվյալ մարդուց: Նման դեպքում դա որակել որպես հետապնդում, մեղմ ասած, ճիշտ չէ»: