Որքան անլուրջ մարդ է ՀՀ նախկին վարչապետ Հրանտ Բագրատյանը, որ նստած «քչփորում է» ընդդիմադիր Էդմոն Մարուքյանի կենսագրականը, այն դեպքում, որ ինձ հետ 5 տարի պատգամավոր է աշխատել: Այս մասին ֆեյսբուքյան ուղիղ եթերում հայտարարել է «Լուսավոր Հայաստան» խմբակցության ղեկավար Էդմոն Մարուքյանը՝ արձագանքելով ՀՀ նախկին վերչապետ Հրանտ Բագրատյանի մարտի 16-ի գրառմանը, որտեղ Բագրատյանը անդրադարձել էր Էդմոն Մարուքյանին: Նախկին վարչապետը մասնավորապես գրել էր.
«Վերցնենք, օրինակ, ընդդիմության “կարկառուն” ներկայացուցիչ Էդմոն Մարուքյանին։ Պարզվում է սա էլ բարձրագույն կրթություն չունի։ Ավարտել է ինչ-որ կոմերցիայի և իրավունքի ինստիտուտ, որը կայք չունի, ոչինչ չունի (բացի 3հարկանի մի շենքի լուսանկարից), ապա ավարտել է մարդու իրավունքների Վարշավայի բարձրագույն դասընթացը և Մինեսոտայի համալսարանի իրավաբանական դպրոցը։ ԱԺ կայքում Նշվում է միայն ավարտի տարին։ Ի՞նչքան է սովորել պարզ չէ. մեկ շաբաթ, մեկ ամիս, երկու ամիս»:
Մարուքյանը ուղիղ եթերում նշեց, որ սա ևս մեկ ապացույց է, որքան անլուրջ մարդիկ են այսօր Հայաստանում զբաղվում քաղաքականությամբ.
«Պատկերացրեք այս մարդու անլրջության մակարդակը, որ եթե ԱԺ կայքում գրված չի ես երբ եմ ընդունվել, ավարտն է միայն գրված, ապա ես բարձրագույն կրթություն չունեմ: Դա նույնն է, եթե ես ասեմ քանի որ չեմ տեսել Հրանտ Բագրատյանի ծննդյան վկայականը, հետևաբար նա չի ծնվել»,-ասաց Մարուքյանը և ուղիղ եթերում ցուցադրեց իր դիպլոմները: