Տեղեկություններ ունեմ, որ Աննա Վարդապետյանը Լոնդոնում «բուֆերային գոտի» է ստեղծել իր համար, բայց թող հույս չունենա, թե փախնելու է, նա կպել է իմ ընտանիքին եւ նա պատժվելու է։ Այս մասին Սաթիկ Սեյրանյանի «PRESSING» հաղորդաշարի ընթացքում հայտարարել է ԱԺ նախկին պատգամավոր, գործարար Ռուբեն Հայրապետյանը, անդրադառնալով վարչապետի իրավական հարցերով խորհրդական Ա․Հայրապետյանի՝ իր գործով քննիչին ուղղորդելու մասին լուրին։
«Ամենազարհուրելին այն է, որ Աննա Հայրապետյանը դասավանդում է համալսարանում, ապագա հանցագործնե՞ր է պատրաստում։ Ինչպե՞ս ԵՊՀ ղեկավարությունը չի վռնդում նրան այսքանից հետո։ Ձեզ չի թվո՞ւմ, որ հենց քննիչներից է այդ տեղեկությունը դուրս եկել նրա ապօրինությունների մասին, որ մի կերպ պրծնեն այդ Աննա Հայրապետյանից, որ միտումնավոր են արել նրանից ազատվելու համար։ Քննիչների մի մեծ խումբ ուրախացել է այդ դեպքի համար։ Իմ քննիչը, եթե խելք ունենար, երեւի ինքն էլ կաներ, գիտի, չէ՞, որ ինքն էլ է պատասխան տալու։ Հասկանում է, չէ, որ հանցագործություն է անում», ասել է Ռ․Հայրապետյանը։
Գործարարը պատմել է, որ Հարսնաքարի հայտնի դեպքը, մարդու մահվան ելքով, իր կյանքի սեւ էջերից է, 6 մարդ դատվել է, ինքն էլ հրաժարվել է պատգամավորի մանդատից, իսկ հիմա բանակի փոխգնդապետին խմբով ծեծի են ենթարկում, մահվան դուռը հասցնում, բոլորն էլ հայտնի է, թե ովքեր են, սակայն 2 տարի է՝ մեղավորները չեն պատժվել։
Ռ․Հայրապետյանի կարծիքով, Լեւոն Տեր-Պետրոսյանն, իր առաջարկով, ուզում է փրկել Փաշինյանին։
«Նիկոլին Նիկոլ է դարձրել Լեւոն Տեր-Պետրոսյանը, ուրիշ բան, որ նա սրբություն չունի, կարող է ուրանալ ամեն ինչ, նա պատրաստ է իր երեխաներին թիրախ դարձնել, փիարի համար օգտագործում է նրանց։ Լ․Տեր-Պետրոսյանը չի մտածում հայրենիքի մասին, նա մտածում է՝ ինչպես փրկել Նիկոլին։ Մենք սերունդ ենք կորցրել, հայրենիք ենք կորցրել, ես գիշերները լաց եմ լինում այդ երեխաների համար, 20 տարի հետո մենք ծնելիություն չենք ունենալու, այդքան աղջիկ չի ամուսնանալու։ Այդ ամենի տակից ինչպես ենք դուրս գալու։ Ես իմ ապրելակերպը վերջին տարիներին պայմանավորում էի Արցախով, երկար ժամանակով այնտեղ էի մնում։ Մենք էլ ենք մեր թերություններն ունեցել, բայց կառուցել ենք։ Ես, որպես ֆուտբոլի ֆեդերացիայի նախագահ, թերություններ եմ ունեցել, բայց ամեն տարի նոր մարզադպրոց ու դաշտ եմ բացել։ Նախկինները, նախկինները․․․ Եթե Սերժ Սարգսյանը կամ Ռոբերտ Քոչարյանը ղեկավարեին այդ պատերազմը, մենք այսպիսի կորուստներ կունենայի՞նք։ Բացառվում է։ Նրանք ամեն մետրը գիտեին Արցախի։ Նրանք երկուսով գնացել էին Արցախ, Արայիկ Հարությունյանը չէր ընդունում, ասում էր՝ ավելի լավ է՝ նրանք նեղանան, քան Նիկոլը, բայց դո՛ւ ես արցախցի, ոչ թե Նիկոլը։ Նախկին նախագահներն էլ էին խոսում փոխզիջումներից, բայց նրանք Հադրութի անուն տվե՞լ են։ Իսկ մտածել ե՞ն՝ ինչ է լինելու արցախցիների վիճակը, նրանց ապագան։ Քարինտակը հերոսաբար կռվել է, օգնության չեն հասել, Շուշին, ճիշտ պաշտպանություն կազմակերպելու դեպքում, աշխարհն էլ շուռ գար, չէին կարող գրավել։ Մինչեւ հիմա չգիտենք՝ ով է եղել Շուշիի պաշտպանության պատասխանատուն, ուզում են շառ անել Սեյրան Օհանյանի վրա, ուր էր թե, Աստված տար Սեյրան Օհանյանը լիներ պատասխանատուն, Շուշին երբեք չէր հանձնվի թշնամուն։ Նիկոլը հոգեկան շեղումներով մարդ է, եթե նայեք կադրերը՝ ինչպես է խոսում իր ռազմական ընդունակությունների մասին, կհամոզվեք, նա խելագար է։ Նա շան պես վախենում է Ալիեւից, դրա համար չի պատասխանում նրա հայհոյանքներին, վախենում է, թե կբացահայտի, թե ինչքան փող է տվել, իմ կարծիքն է դա», ասել է Ռ․Հայրապետյանը։
Հիշեցնելով «Հայաստան» համահայկական հիմնադրամի՝ կառավարությանը փոխանցած գումարի մասին, Ռուբեն Հայրապետյանը հարցրել է՝ գիտե՞ք, թե որքան ԱԹՍ կարելի էր գնել 107 միլիոն դոլարով, որը փոխանցել են բյուջե եւ հայտնի չէ՝ ինչի վրա են ծախսել։ Ըստ նրա, հիմնադրամի հոգաբարձուների խորհրդի անդամ, նախկին նախագահ Ռոբերտ Քոչարյանի առաջարկը՝ այդ գումարը պարտք ձեւակերպել հիմնադրամին, վերադարձնելուց հետո ծախսել Արցախի կարիքների համար, այս կառավարությունը չի ընդունի, քանի որ ստիպված կլինի ցույց տալ, թե ինչի վրա է ծախսել այդ գումարները։
Ռ․Հայրապետյանի կարծիքով՝ եթե Փաշինյանը մնաց իշխանության, նա կեղծիքներով «կհաղթի» ընտրություններում։
«Ժողովուրդը պետք է գնա եւ Նիկոլի ականջից բռնած դուրս շպրտի կառավարությունից, այլ դեպքում նա իշխանությունը չի հանձնի», ասել է գործարարը։
Վերջում Ռուբեն Հայրապետյանն ասել է, որ Հայաստան կվերադառնա եւ կշարունակի իր գործերով զբաղվել, երբ իր հանդեպ քրեական հետապնդումը դադարեցվի։