ԱՄՆ քաղաքականությունը Թուրքիայի նկատմամբ Ջո Բայդենի իշխանության գալուց հետո բավական փոխվում է: Ասուլիսում նման տեսակետ հայտնեց արևելագետ-թուրքագետ, ՀՀ ԳԱԱ ակադեմիկոս, պատմական գիտությունների դոկտոր, ՀՀ ԳԱԱ Արևելագիտության ինստիտուտի գիտական ղեկավար Ռուբեն Սաֆրաստյանը:
«Միայն մեկ փաստ. Թուրքիայի ղեկավարությունը մեծ ջանքեր է գործադրում, որ հեռախոսազրույց տեղի ունենա Բայդենի ու Էրդողանի միջև, Վաշինգտոնից արձագանք չկա: Սա բավական խոսուն փաստ է:
Բացի դրանից, եթե այդ հարցը մի քիչ էլ ավելի գլոբալ տեսակետից դիտարկենք, ապա տեղի է ունենում ամերիկյան ռազմավարարության փոփոխություն համաշխարհային մասշտաբով, ԱՄՆ արտաքին քաղաքականության կենտրոնը տեղափոխվում է դեպի Խաղաղ Օվկիանոս՝ կապված Չինաստանի դերակատարության հետ և Մերձավոր Արևելքը սկսում է կորցնել այն առաջնային նշանակությունը, որ ամերիկյան ռազմավարությունը տվել է տասնյակ տարիներ: Սա նշանակում է, որ Թուրքիայի դերը, նշանակությունը ամերիկյան արտաքին քաղաքականության մեջ փոխվում է, թուլանում է»,- ասաց Ռ. Սաֆրաստյանը:
Նրա խոսքով, Թուրքիայի նշանակությունն ամերիկյան գլոբալ քաղաքականության մեջ արդեն այն չէ, ինչ որ մի քանի տարի առաջ:
«Վերջերս մոտ 4 տասնյակից ավելի ամերիկացի կոնգրեսականներ՝ և Հանրապետականներ, և Դեմոկրատներ, դիմել էին ԱՄՆ նախագահին ճանաչելու Հայոց ցեղասպանությունը: Ամերիկյան քաղաքական կյանքի ներկա պայմաններում, երբ երկու կուսակցությունների միջև հարաբերությունները բավական սուր են, խոսուն փաստ է, որ կարողացել են երկու կուսակցությունների ներկայացուցիչներ համատեղ նամակով հանդես գալ:
Մյուս կողմից՝ Բայդենը հայտարարում է, որ իր արտաքին քաղաքականության մեջ ուժեղանում է մարդու իրավունքների պաշտպանության գիծը: Եվ որոշ վերլուծաբաններ գտնում են, որ այս նոր մոտեցումը նպաստում է Հայոց ցեղասպանության ճանաչմանը, քանի որ Հայոց ցեղասպանությունը դիտարկվում է այդ տեսակետից:
Ամենավերջին փաստը. բացառիորեն երեկ ինֆորմացիա եղավ, որ Սպիտակ տան մերձավոր շրջանակներից մեկ-երկու աղբյուր հաղորդել են կոնֆիդենցիալ՝ Բայդենը պատրաստվում է ճանաչել Հայոց ցեղասպանությունը և ապրիլի 24-ի ուղերձը կլինի դրա արտահայտումներից մեկը:
Այսինքն՝ նախանշաններ կան»,- ասաց թուրքագետը:
Ռուբեն Սաֆրաստյանը համոզված է, որ Հայաստանը և Թուրքիան կարող են ունենալ նորմալ հարաբերություններ. «Ընդգծում եմ՝ նորմալ բառը, խուսափելով բարիդրացիական, քանի որ բարի դրացի լինելու համար պետք է շատ երկար ճանապարհ անցնենք:
Մեր կողմից պետական մակարդակով երբևէ թշնամական մոտեցում Թուրքիայի նկատմամբ չի եղել: Խոսքը գնում է արդարության վերականգնման մասին, այն ծանրագույն հանցագործության դատապարտման մասին, որ իրականացրել է Օսմանյան կայսրությունը հայ ժողովրդի, ողջ մարդակության նկատմամբ: Դա ծանրագույն հանցագործություն է մարդկության նկատմամբ, խոսքը գնում է այդ ծանրագույն հանցագործությունն իր անունով կոչելու, դատապարտելու մասին»:
Նա նշեց, որ Հայոց ցեղասպանության ճանաչման խնդիրը դարձել է մեր ինքնության բաղկացուցիչ մասերից մեկը:
Ռուբեն Սաֆրաստյանը հույս ու հավատ ունի, որ Հայաստանի արտաքին քաղաքականությունը հիմնված կլինի ազգային արժեքների վրա, արժեքային արտաքին քաղաքականություն կլինի. «Սա արտաքին քաղաքականության մի նոր ուղղություն է, որ սկսում է աշխարհում զարգանալ: Մենք այն երկիրն ենք, ժողովուրդը, հաշվի առնելով մեր հազարամյա անցած ճանապարհը, քաղաքակրթական առանձնահատկությունները, որ մենք ուղղակի պարտավոր ենք արտաքին այդպիսի քաղաքականություն անցկացնել: Դա նշանակում է, որ մեր պետականությունն էլ պետք է հիմնվի ազգային գաղափարաների վրա: Սա իմ տեսլականն է, հույս ունեմ կամաց-կամաց կսկսի իրականություն դառնալ»: