ԱԺ «Իմ քայլը» խմբակցության պատգամավորը ճեպազրույցի ժամանակ խուսափեց պատասխանել հարցին՝ արդյոք վտանգ տեսնում են, որ Հայաստանին ինտերնետ մատակարարող մալուխի սեփականատերն ադրբեջանցի է։
ԱԺ «Իմ քայլը» խմբակցության պատգամավոր Հայկ Կոնջորյանն ասաց, որ այդ հարցի վերաբերյալ համապատասխան գերատեսչությունների կողմից հավելյալ մեկնաբանություններ կլինեն․
«Առաջիկայում այդ հարցի վերաբերյալ պարզաբանումներ կլինեն»,-ասաց պատգամավորը։
Հարցին՝ արդյոք դրանում վտանգներ չե՞ն տեսնում, պատգամավորն արձագանքեց․
«Ես արդեն նշեցի և պատասխանեցի ձեր հարցին»։
Ավելի վաղ հայտնել էինք, որ ադրբեջանական ընկերությանը հաջողվել է դառնալ վրացական «Caucasus Online»-ի 100 տոկոսի բաժնետերը։ Գործարքը կնքվել է մի քանի օր առաջ, և արդյունքում Caucasus Online ընկերության 100% բաժնետեր է դարձել ադրբեջանցի գործարար Նասիբ Հասանովը։
Նշենք, որ 2008 թվականից Caucasus Online ընկերությունը Սև ծովի հատակով անցնող 1200 կմ երկարությամբ օպտիկամանրաթելային մալուխի միակ սեփականատերն է։ Այդ մալուխի օգնությամբ իրականացվում է ինտերնետի տարանցում Եվրոպայից դեպի Հարավային Կովկաս և Կասպից տարածաշրջան։
Caucasus Online -ը ինտերնետ է մատակարարում Հայաստանի ինտերնետի մոտ 85 տոկոսը։