Էկոնոմիկայի նախարար Վահան Քերոբյանի վերջին ֆեյսբուքյան գրառմանն անդրադառնալը տնտեսագետներն անլուրջ են համարում:
ՀՅԴ Բյուրոյի տնտեսական հետազոտությունների գրասենյակի պատասխանատու Սուրեն Պարսյանը, ակնարկելով Քերոբյանի գրառումը, ֆեյսբուքի իր էջում գրել էր.
«Խորհուրդ լրագրողներին,
Վերջին շրջանում բարձրաստիճան պաշտոնյաների անհեթեթ և չհիմնավորված հայտարարությունների պարզաբանման համար ինձ դիմող լրագրողները լավ հասկանում են, որ այդ հայտարարությունները սխալ են, բայց նեղ մասնագետ չլինելով՝ մտքի ծայրով կարծում են, որ հնարավոր է պաշտոնյան, ինչ որ բան է նկատի ունեցել, որն իրանք չգիտեն։
Իմ խորհուրդը ձեզ, սիրելի լրագրողներ, մի կասկածեք ինքներդ ձեզ, հումորով վերաբերվեք այդ հայտարարություններին․․․ճճճճ»:
Panorama.am-ի հետ զրույցում տնտեսագետը նշեց, որ ինչպես լրագրողները կարծում են, որ հայտարարությունը սխալ է՝ այդպես էլ կա և ավելացնելու որևէ բան չունի:
Գնահատելով Վահան Քերոբյանի՝ տնտեսական աճի երկնիշ թիվ ապահովելու պնդումը՝ Պարսյանը նշեց. «Երկնիշ թիվ ապահովելու համար դու պետք է ունենաս համապատասխան տնտեսական կառուցվածք, աճ ապահովող ոլորտներ, բևեռներ, իսկ այս պահին նման աճ ապահովող ոլորտներ չունենք, բացառությամբ հանքարդյունաբերությանը, սակայն զուտ դրա հաշվին հնարավոր չէ երկնիշ աճ ապահովել»:
Տնտեսական հետազոտությունների գրասենյակի պատասխանատուի կարծիքով՝ երկնիշ աճ հնարավոր է ապահովել միայն այն դեպքում, երբ շինարարության ոլորտը շատ ակտիվ աճ գրանցի, բայց 2020-21 թվականներին հատկապես մասնավոր շինարարության մասով, լուրջ մտահոգություններ կան, քանի որ բազմաթիվ ծրագրեր են սառեցված:
Պարսյանը նկատեց, որ այստեղ խոսքը չի գնում պետական ծրագրերով ճանապարհների ենթակառուցվածքների ձևավորման դեպքին:
Շեշտելով որ, այս իրավիճակում հնարավոր չէ խոսել երկնիշ աճի մասին՝ Սուրեն Պարսյանը փաստեց. «Որևէ երկիր 7.6% տնտեսական անկման տարուց հետո չի գրանցել երկնիշ աճ: Առհասարակ, նման դեպքերում հաջորդ տարիները համարվում են ճգնաժամի վերականգնման տարի և նման իրավիճակում լավագույն ցուցանիշ է դիտվում նույնիսկ1-2% աճը: Այդպես է եղել և՛ 1998 թվականի, և՛ 2009 թվականի ճգնաժամերին հաջորդած տարիներին, և առհասարակ համաշխարհային փորձն է դրա մասին վկայում»:
Ըստ տնտեսագետի՝ զուտ պոպուլիստական հայտարարություններով չեն կարող դրական սպասումներ ստեղծել հանրության մոտ, այլ հակառակը՝ այն ավելացնում է անորոշությունը և անվստահությունը:
Հիշեցնենք, որ Էկոնոմիկայի նախարարը մարտի 25-ին գրառում էր արել, որում ասվում էր.
«Վիճակագրական Կոմիտեն հրապարակեց 2021թ․ փետրվարի տնտեսական ակտիվության ցուցանիշը՝ -5,3%: Հաշվի առնելով, որ անցած տարվա փետրվարն ուներ մեկ օր ավել՝ Հայաստանի տնտեսությունը համարյա վերականգնվել է։ Ու դա դեռ զրոյին մոտ տուրիզմի պարագայում։
Վերահաստատում եմ իմ նպատակը՝ երկնիշ տնտեսական աճ»։