Անկախ պատգամավոր Գևորգ Պետրոսյանը շնորհակալություն է հայտնում Սահմանադրական դատարանի ողջ կազմին բացառությամբ մեկից, «ով որ այդպես էլ փախած է Սահմանադրական դատարանից»:
«Իսկապես, ՍԴ-ն գտնվեց իր բարձունքի վրա»,- ասուլիսում ասաց Գևորգ Պետրոսյանը՝ խոսելով ՍԴ-ի կողմից ՔՕ 300.1 հոդվածը հակասահմանադրական ճանաչելու մասին։
Նրա խոսքով, քաղաքական հետապնդումների, քաղաքական մթնոլորտի առումով գուցե սպասելի չէր. «Փաշինյանը կուրծք էր ծեծում ՍԴ-ն իրենով անելու ուղղությամբ, ենթադրում էր, որ արդեն ինքն իրենով էր արել, ասում էր՝ ՍԴ խնդիրն արդեն լուծված էր: Իր կարճ խելքով մտածում էր՝ լուծվածն այն է, որ ինչ ուզի, ՍԴ-ն պետք է անի:
ՍԴ-ն, ի պատիվ բոլոր դատավորների, սառը ցնցուղ մատուցեց նրան: Երևի դրա համար էլ ընկել է ցայտնոտի մեջ, տարօրինակ հայտարարություններ է անում: ՍԴ որոշումը եղել է բացառապես Սահմանադրության և Հայաստանի գործող օրենսդրության մյուս ակտերի պահանջներին համապատասխան»:
Նա նաև շնորհավորեց ՀՀ երկրորդ նախագահ Ռոբերտ Քոչարյանի պաշտպաններին՝ գրագետ, տիտանական աշխատանք տանելու ու հաջողության հասնելու համար:
Պատգամավորն ընդգծեց՝ այստեղ պետք չէ անձնավորել խնդիրը, այլ արդարության հաղթանակի խնդիրն է:
«Մենք դեռ հույսեր ունենք, որ մեր երկրում ամեն ինչ կործանված չէ»,- ասաց Գևորգ Պետրոսյանը:
Անդրադառնալով ՍԴ որոշումից հետո «մի քանի շառլատանների հորինած թեզին», պատգամավորն ասաց. «Զզվելին այն է՝ իրենք մատնում են իրենց, որ պարզապես ուզում են երկրորդ նախագահն ազատության մեջ չգտնվի: Արա լավ, ամոթ չունեք, այդքան էժան եք: Հակառակ՝ եթե մի քիչ խելք ունենային, կասեին՝ ողջունում ենք, Նիկոլ Փաշինյանի օրոք ՍԴ-ն օրինական որոշում կայացրեց: Այդքան խելք չունեն գոնե այդքան բան ասեն: Ուզում են անպայման Ռոբերտ Քոչարյանին բանտարկված տեսնել: Ինչի՞ համար այ անուղեղներ:
Էդ Արթուր Սաքունցը, երբ ես 2001 թվականին Վանաձորի հայ-ռուսական միջազգային համալսարանի հասարակական գիտությունների ամբիոնի վարիչն էի և պետական քննական հանձնաժողովի նախագահ, պետական քննությունից անբավարար ստացավ, միլիոն մարդու մեջ գցեց, որ վերաքննության արդյունքում դրական ստանա: Բա այ տղա, դու որ Քրեական իրավունք առարկայից պետական քննություն չես կարողացել հանձնել, եկել ու այսօր խոսում ես Ռոբերտ Քոչարյանի դատավարությունի՞ց, Քրեական օրենսգրքի՞ց: Գնա ուրիշ բանով զբաղվի, դա քո տեղը չէ»:
Հարցին՝ ՍԴ այս որոշումը նշանակում է, որ Փաշինյանը հանձնվե՞լ է, այլևս չի փորձում ճնշե՞լ, թե՞ ճնշել իր մոտ չի ստացվել, Գևորգ Պետրոսյանն ասաց. «Որպես կանոն գելխեղդները չեն հանձնվում, բայց ինքը գուցե հանձնվել է:
Նա էլ է դժվար հանձնվող ոչ թե որ գելխեղդ է, դա իր երևականությունն է, այլ ինքը հասկանում է, որ հանձնվելու պարագայում իր երկրորդ հանգրվանը որտեղ է: Դա ԱԱԾ մեկուսարանն է: Ինքը դա հասկանալով՝ հիմա տարբեր խաղեր կտա, կգնա բացահայտ անօրինականությունների»: