Ես դատարանից չէի սպասում այդպիսի ծաղր իրավաբանության հանդեպ, սակայն դատախազների ներկայանալը սպասելի էր, քանի որ վերջին երեք տարում դատախազությունը որևէ պարագայում չի առաջնորդվում օրենքով: Այս մասին Ռոբերտ Քոչարյանի և մյուսների գործով դատական նիստից հետո լրագրողների հետ զրույցում ասաց Յուրի Խաչատուրովի պաշտպան Միհրան Պողոսյանը՝ հավելելով, որ մենք Հայաստանում ունենք դատախազություն, որը դիտավորյալ նիստերին չի գալիս և ձախողում է դատական նիստը.
«Թեև դատախազները չներկայացան, սակայն դա որևէ հիմք չէր տալիս դատարանին քրեական հետապնդումը դադարեցնելու մասին որոշում կայացնելու համար: Միջնորդությունը չպետք է քննարկվի ՍԴ որոշումից հետո, հիմք ընդունելով նաև ՍԴ-ի մասին օրենքի 168-րդ հոդվածը, տվյալ նորմը դադարել է իրավաբանական հանրությունում գոյություն ունենալ հենց ընդունման պահից՝ 2009թ-ից: ՔՕ-ում չկա 301.1 հոդված: Եթե դատարանը հայտնաբերում է այդպիսի հանգամանք, ապա իրավասու է խորհրդակցական սենյակում որոշում կայացնել՝ քրեական հետապնդումը դադարեցնելու համար»,-ասաց Պողոսյանը:
Փաստաբանի խոսքով՝ իրենք իրավասու են հաջորդ դատական նիստին չներկայանալ, քանի որ այլևս չկա օրինական մեղադրանք Յուրի Խաչատուրովի նկատմամբ, ուստի նա չունի պաշտպանի անհրաժեշտություն.
«Մեզ անհրաժեշտ էր միայն այն իրավական որոշումը, որը կարձանագրեր այն, ինչը բոլորի համար ակնհայտ էր»,-ասաց Միհրան Պողոսյանը:
Հարցին՝ հավանական է համարում մեղադրանքի փոփոխությունը՝ փաստաբանը արձագանքեց.
«Հաշվի առնելով վերջին երեք տարում ՀՀ-ում տեղի ունեցող ալոգիկ գործողությունները՝ որևէ բան եմ բացառում, թե քաղաքական իշխանության մտքին էլ ինչ քամիներ կփչեն, իսկ իրավական առումով ես բացառում եմ օրինական նոր մեղադրանքի ի հայտ բերումը»: