Ադրբեջանի կողմից Արցախի դեմ սանձազերծված պատերազմի հետևանքով Քաշաթաղի բնակավայրերից տեղահանված քաղաքացիներն ունեն բազում խնդիրներ՝ սկսած բնակարանից՝ մինչև աշխատանքի, սնունդի, հագուստի բացակայություն:
«Մերան» պաշտոնաթերթի գլխավոր խմբագիր Զոհրաբ Ըռքոյանի փոխանցմամբ՝ ազատագրված շրջանում վերաբնակվելու առաջարկը շատերն են ընդունել և Հայաստանում վաճառելով իրենց բնակարանները՝ տեղափոխվել են Քաշաթաղ: Մյուս մասը 1988թ. Սպիտակի երկրաշարժից հետո է տեղափոխվել:
«Հիմա ամենակարևորը բնակարանի խնդիրն է, զբաղվածությունը: Մարդիկ ունեն նաև փաստաթղթերի խնդիր, ինչի բացակայությունը երբեմն դժվարություն է առաջացնում կառավարության կողմից հատկացվող աջակցության ծրագրերից օգտվելիս, չնայած այս ամենը կարգավորվող է, հիմնականը բնակարանի և աշխատանքի հարցն է»,- 168.am-ի հետ զրույցում ասաց Զոհրաբ Ըռքոյանը:
Նա նշեց՝ ով որտեղից գնացել էր՝ վերաբնակվել, հիմա վերադառնում է իր բնակավայր:
«Շատերը Երևանում են, Աբովյանում, ոմանք՝ վարձով, ոմանք՝ բարեկամի տանը: Ես Բերձորից եմ, տունս եմ թողել-եկել, բայց դա այնքան էլ կարևոր չէ, Հայրենիքս եմ թողել: 25-30 տարի մենք ապրեցինք, ստեղծեցինք ու թողեցինք: Մեզ առաջին հերթին անհանգստացնում է նաև երեք բնակավայրերի կարգավիճակը՝ Բերձորի, Ներքին Սուսի, Աղավնոյի: Այո՛, մեր ժողովուրդն այնտեղ ապրում է, նույնիսկ Աղավնոյում դպրոց կա, մանկապարտեզ են կառուցում, բայց հետագա ճակատագիրը մենք չգիտենք»,- նշեց Զոհրաբ Ըռքոյանը՝ հավելելով, որ մինչև Արցախյան 2-րդ պատերազմը Քաշաթաղում ապրել է մոտ 10.000 բնակիչ, մեծ մասը հետ են եկել, 200-300 հոգի մնացել է Բերձորում, Աղավնոյում, մի քանի ընտանիք տեղափոխվել է Արցախի Բադարա գյուղ, բայց հիմնական մասը Հայաստանում է:
Հավելենք, որ մարտի 29-ին ՀՀ փոխվարչապետ Մհեր Գրիգորյանի գլխավորությամբ ՀՀ կառավարությունում կայացել է Արցախի հարցերով միջգերատեսչական աշխատանքային խմբի հերթական նիստը: Կառավարությունից հայտնում են, որ նիստին մասնակցել են նաև քաշաթաղցիների և հադրութցիների ներկայացուցիչները:
Մհեր Գրիգորյանը կարևորել է արցախցիների մասնակցությունը նիստի աշխատանքներին և նշել, որ առաջիկա նիստին ընդառաջ կմշակվի բնակարանային ապահովման վերաբերյալ հայեցակարգի նախագիծը, որը կշրջանառվի՝ ինչպես շահագրգիռ մարմինների, այնպես էլ՝ նիստին հրավիրված արցախցիների շրջանում: