Եթե ապրիլյանից դասեր քաղած չլինեինք, այս 44-օրյա հերոսամարտն այլ ելք կունենար և այլ ժամկետներում: Մենք կարող էինք ամբողջությամբ կորցնել Արցախը և դա կարող էր արվել 15-20 օրվա ընթացքում: Այս մասին Եռաբլուր պանթեոնում լրագրողների հետ զրույցում ասաց ԶՈՒ Գլխավոր շտաբի պետ Արտակ Դավթյանը:
Վերջինիս դիտարկմամբ՝ ԳՇ-ում իրավիճակն այլևս հանգուցալուծված է.
«Որևէ խնդիր չկա, Գլխավոր շտաբը բնականոն աշխատում է:
Իսկ դատարանի որոշումը և մեկնաբանությունները իրավաբանների գործն է, նրանցից յուրաքանչյուրն իր տեսակետից անում է մեկնաբանություն: ԳՇ-ն կատարում է իր առջև դրված խնդիրները»,-ասաց Արտակ Դավթյանը:
Թե ինչպե՞ս է գնահատում սահմանում տիրող իրավիճակը, ԳՇ պետն արձանագրեց, որ սահմաններին հարաբերական կայունություն է.
«Ընդհանուր առմամբ տարածաշրջանում իրավիճակը բավականին լարված է, մեր սահմաններին հարաբերական կայունություն է, միջադեպեր որպես այդպիսին գրեթե չեն կիրառվում, սակայն ընդհանուր լարվածությունը, որը կա, շարունակվում է և դա ազդեցություն է ունենում սահմանային ծառայության և ընդհանուր մեր առօրյա կյանքի վրա»,-ասաց Դավթյանը:
Հարցին, պատերազմի ժամանակ «Իսկանդեր» կիրառվել է, ԳՇ պետը պատասխանեց. «Ոչինչ չեմ կարող ասել, որովհետեւ հրապարակման ենթակա չէ»: