Կառավարության դիմաց կրկին բողոքի էին դուրս եկել ժամկետային զինծառայողների ծնողները՝ պահանջելով ժամկետից շուտ զորացրել 44 օր պատերազմին մասնակցած զինվորներին։ Ծնողները պահանջում էին հանդիպել վարչապետ Նիկոլ Փաշինյանի հետ։
Ժամկետային զինծառայողների հարազատներին շենքի դիմաց հանդիպեց վարչապետի օգնական Նաիրի Սարգսյանը, տեղեկացրեց, որ Մոսկվա այցով պայմանավորված վարչապետը ինքնամեկուսացման մեջ է և նշեց՝ երբ վարչապետը ապրիլի 7-ին նախատեսված հանդիպումից հետո վերադառնա Երևան՝ մեծ դահլիճում քննարկում կկազմակերպվի, որտեղ ներկա կլինեն բոլոր ծնողները՝ կքննարկեն հարցերը, կգտնեն լուծումներ, սակայն բողոքի ակցիա անող ծնողները առաջարկը մերժեցին, նշելով, որ երկու շաբաթ առաջ էին խոստացել, որ իրենց պատասխան կտրվի։
Ծնողները Սարգսյանին հիշեցրեցին, որ Արցախի պատերազմին մասնակցած ժամկետային զինծառայողներին սոցիալական փաթեթ պետք է տրամադրվի, որպեսզի լուծվի նրանց առողջական խնդիրները։ Բացի այդ ծնոնղերը պահանջում են Արցախում ծառայած զինծառայոնղերի ծառայության ժամկետը խրախուսական ձևով կրճատելու մասին։
Ժամկետային զինծառայողների ծնողները հայտարարեցին, որ 7 օր նստացույց են անելու, ապա քայլերթով շարժվեցին ՀՀ-ում ՌԴ դեսպանատան մոտ՝ խնդրելու Ռուսաստանին, օգնել իրենց՝ զորացրելու իրենց որդիներին։
Ծնողները նշում են նաև, որ որևէ մեկը չի հետաքրքրվել ծառայողների առողջական վիճակով, շարունակում իրենց ծառայությունը հոգեկան ծանր ապրումներով։ Զինծառայողներից շատերին ծնողները 7-8 ամիս է՝ չեն տեսել։ Ծնողները պահանջում են նաև զինծառայողներին սոցփաթեթից օգտվելու հնարավորություն տալ։