Արկադի Տեր-Թադևոսյանն այն անհատականություններից է, որ մեծ դերակատարություն է ունեցել մեր երկրի նորագույն պատմության մեջ, կարողացավ այդ ժամանակաշրջանում և՛ համախմբել, և՛ զորավարժությունների իր փորձը՝ որպես կադրային սպա, փոխանցել է ֆիդայական շարժման մեր տղերքին։ Այն հաջողությունները, որ մենք ունեցանք Արցախյան առաջին պատերազմում, ամենամեծ բաժինը Կոմանդոսինն էր։ Այս մասին լրագրողների հետ զրույցում ասաց ԵԿՄ նախագահ, ԱԺ պատգամավոր Սասուն Միքայելյանը։
«Մեծությունները պետք է գնահատվեն բոլոր իշխանությունների օրոք։ Իրենց գործը պետք է գնահատվի և փոխանցի ապագա սերունդին, որ ապագա սերունդներն էլ պատկերացում ունենան՝ հերոսների վերաբերյալ»,- նշեց Միքայելյանը։
Նրա խոսքով՝ Կոմանդոսն ապրել է այն Հայաստանում, որտեղ մենք միշտ հաղթանակներ ենք տարել և դժբախտությունը հենց նրանում է, որ հաղթանակած գեներալը տեսավ այս պարտությունը և վշտով գնաց այս աշխարհից։
«Շուշիի կորուստը ծանր է տարել, որովհետև Շուշիի օպերացիան հենց ինքն էր ղեկավարել»,-նշեց նա՝ հավելելով, որ Կոմանդոսն իր ռազմական գիտելիքներով, գաղափարով կարողացավ հասնել նրան, որ Շուշին ազատագրեցինք, որն ամենաանառիկ էր թվում։
«Տղաները, այնտեղ՝ որտեղ որ ընկան, մեզ համար սրբավայր է։ Մենք պարտավոր ենք միշտ ձգտել և վերադառնալ մեր սրբավայրերը»,- նշեց նա։