Ռուսական «Ինտերֆաքս»-ը հարցազրույց է անցկացրել Նիկոլ Փաշինյանի հետ, որում վերջինս նշել է, թե Երևանը չափազանց շահագրգռված է ռուսական զենքի, մասնավորապես՝ «Սու-30 ՍՄ» կործանիչների մատակարարմամբ, և կենտրոնացած է Մոսկվայի հետ լայն և երկարաժամկետ ռազմատեխնիկական համագործակցության վրա, ինչը բխում է երկու պետությունների երկարաժամկետ ռազմավարական շահերից։ Նախ «Իսկանդերի» 10%-ով պայթելը, ապա «Սու-30 ՍՄ» կործանիչների նկատմամբ խիստ հետաքրքրությունը հարցեր են առաջացնում.
1. Ինչո՞ւ են Փաշինյանի՝ ռուսական զենքի վերաբերյալ հայտարարություններն այդքան իրարամերժ։
2. Արդյո՞ք այս ամենում կա առաջիկա ընտրություններին ընդառաջ Ռուսաստանին սիրաշահելու և նրանից ինչ-որ աջակցություն ստանալու ակնկալիք։
3. Արդյո՞ք այդ կործանիչների ձեռքբերումը հիմա խիստ նպատակային է, քանի որ կա նոր պատերազմի վտանգ։
Panorama.am-ի հարցերին պատասխանել են քաղտեխնոլոգներ Կարեն Քոչարյանը, Արմեն Բադալյանը և ռազմական փորձագետ Կարեն Վրթանեսյանը։
Փաշինյանն ապրում է մեկ օրվա կուրսով, ըստ այդ օրվա կուրսի էլ իր պահանջները բավարարում է. Արմեն Բադալյան
Փաշինյանն ապրում է մեկ օրվա կուրսով, ըստ այդ օրվա կուրսի էլ իր պահանջները բավարարում է։ Եթե այդ օրն իրեն անհրաժեշտ է լինում փնովել ռուսական զենքը՝ իհարկե քաղաքական ենթատեքստով, ապա նա փնովում է, իսկ հաջորդ օրը, երբ նա պետք է հանդիպի ՌԴ նախագահին, բնական է, որ պետք է հակառակ տեսակետ հայտնի՝ նշելով, որ ռուսական այսինչ զենքը բավականին լավն է և այլն։ Այսինքն՝ ինքն օրվա կուրսով իր քաղաքականությունն է իրականացնում. տվյալ պահին ինչն անձամբ իրեն է ձեռք տալիս, դա էլ անում է։ Իհարկե, դա ոչ մի կապ չունի պետական շահի հետ, այն լինում է երկարատև և կախված չի օրվա կուրսից։
Հիմա Փաշինյանը հասկանում է, որ երբ հանդիպի Պուտինին, կարող է «Իսկանդերի» վերաբերյալ հարց լինել, ինչին ի պատասխան ինքը կարող է նշել, որ փոխարենը ռուսական մեկ այլ զենք է գովել։ Տեսեք, երբ ինքը «Իսկանդերի» մասին վատ արտահայտվեց, դա բավականին լայն արձագանք գտավ Արևմուտքում, քանի որ հարված էր ռուսական զենքի որակին, իսկ Փաշինյանի նպատակն էլ հենց դա էր՝ դուր գալ Արևմուտքին։ Բայց կարծում եմ, որ ռուսական կողմն արդեն լավ ճանաչում է Փաշինյանին, և գիտի՝ ինչ նշանակություն ու արժեք ունեն նրա ասածները։ Ընդհանրապես, նրա հայտարարություններն օգտագործում են, երբ դրանք պետք են լինում։
Հիմա ինքը ռուսական ամեն ինչով հետաքրքրվելու է՝ անգամ «կաստրուլյաներով». Կարեն Քոչարյան
Կարծում եմ, որ Փաշինյանի հայտարարությունը որոշակի աջակցություն ստանալու նպատակ ունի։ Հիմա ինքը ռուսական ամեն ինչով հետաքրքրվելու է՝ անգամ «կաստրուլյաներով»։ Ինքն ամեն գնով փորձում է շահել ռուսական կողմի հետաքրքրությունը։
Բայց եթե հաշվի առնենք, թե երեկ ով էր Վլադիմիր Պոզների հյուրը, ապա նա հնարավորություն չունի իր այդ նպատակին հասնելու։
«Սու-30 ՍՄ»-ն իրականում լավ զենք է, եթե իհարկե, համապատասխան զինամթերք ունենանք հետը. Կարեն Վրթանեսյան
Նոր պատերազմի հավանականությունը մեծ է. Ադրբեջանը չի համարում պատերզմը ավարտված, թափով վերականգնում է իր կորուստները, ֆորմայի է բերում իր զինված ուժերը, ու ակնհայտ է, որ ինչ-որ պահի էլի փորձելու է իր կամքը թելադրել Հայաստանում, այսինքն՝ այդ պրոցեսը չի էլ դադարել, բայց մենք մեզ համար պետք է հստակ ֆիքսենք. Ադրբեջանի համար այս պատերազմն ավարտված չէ, անկախ նրանից թե ինչ են ՀՀ իշխանությունները զառանցում խաղաղության մասին։ Պատերազմից հետո հիմա մենք ունենք նոր անպաշտպան սահմաններ, նոր զորամասեր, լրիվ փոխվել է տրամաբանությունը, և այդ ամենի ֆոնին, բնականաբար, մենք պետք է վերազինենք բանակը, շատ բաներ վերանայենք։
«Սու-30 ՍՄ»-ն իրականում լավ զենք է, եթե իհարկե, օգտագործենք, համապատասխան զինամթերք ունենանք հետը, բայց այս պահին պետք է հասկանալ՝ որն է առաջնահերթ մեզ համար։ Ես չգիտեմ՝ Նիկոլը ինչ է հայտարարել, մենք արդեն գիտենք, որ իր հայտարարություններին լուրջ վերաբերվել չի կարելի՝ մի օր մի բան է ասում, հաջորդ օրը՝ այլ։ Բայց մի բան հստակ է՝ պետք է բանակը վերազինել, մի բան, որ այսօր չի արվում։ Բանակը մի հարված ստացավ պատերազմից, իսկ երկրորդ հարվածը հասցրեց Նիկոլը՝ գեներալիտետին իրար խառնելով և ԳՇ-ում եռիշխանություն հաստատելով։
Այս ֆոնին «Սու-30 ՍՄ»-երին անդրադառնալը չգիտեմ՝ ինչքանով է լուրջ։