Գիտության բոլոր մակարդակներում աշխատավարձերը վերանայվելու են, քանի որ մյուս ոլորտների հետ համեմատած՝ գիտությունը, որպես այդպիսին, գրավչություն չունի։ Կառավարության նիստի ժամանակ այս մասին ասաց ՀՀ փոխվարչապետ Տիգրան Ավինյանը։
«Գիտությամբ զբաղվող անձանց միջին տարիքը շատ բարձր է և երիտասարդացման գործընթացը գիտության մեջ տեղի չի ունենում։ Կարծում եմ՝ մենք միանշանակ կարողանալու ենք աշխատավարձերի վերանայման միջոցով գրավչությունն ավելացնել, միանշանակ ավելի շատ երիտասարդներ գնալու են դեպի գիտություն և հնարավորություն են ունենալու գիտությամբ զբաղվելով ապրել, արարել և չփորձել այլընտրանքային աշխատանքներ գտնել»,-ասաց Տիգրան Ավինյանը։
Փոխվարչապետը համոզված է, որ գիտության նկատմամբ և՛ գրավչությունը, և՛ արդյունքներն էականորեն ավելի լավն են լինելու։
ՀՀ վարչապետ Նիկոլ Փաշինյանն ընդգծեց, որ կրթության և գիտության ոլորտում տեղի են ունեցել հիմնարար փոփոխություններ. «Դեռևս 2019թ.-ից բյուջեի հավելյալ միջոցներից տրամադրեցինք գիտության ոլորտին և ձեռք բերվեց շոշափելի քանակությամբ լաբորատոր տեխնիկա, սարքավորումներ»,-ասաց Նիկոլ Փաշինյանը։