Ինքնաթիռի մեջ Մուրադովն է եղել, իսկ դա նշանակում է՝ եղել են պայմանավորվածություններ, որոնք խախտվել են։ Լրագրողների հետ զրույցի ժամանակ այս մասին ասաց ԱԺ պաշտպանության և անվտանգության հարցերի հանձնաժողովի նախագահ Անդրանիկ Քոչարյանը։
«Պատճառները հասանելի չեն։ Ենթադրությունների դաշտում կարող եմ ասել, որ հերթական անգամ հակառակորդը խաղի կանոններ է ուզում փոխել։ Գուցե դա պայմանավորված է հրադադարի ռեժիմի մեջ որոշում կայացնողների մեջ։ Այսինքն հրադադարի ռեժիմի մեջ Հայաստանի վարչապետի, Ռուսաստանի և Ադրբեջանի նախագահների ստորագրություններն են և գուցե այստեղ ինչ-որ խնդիր է արծարծվում, որը խանգարում է գերիների վերադարձին»,-նշեց Անդրանիկ Քոչարյանը։
Դիտարկմանը, որ կա տեսակետ, որ գերիներին պահում են տարածքների դիմաց, Անդրանիկ Քոչարյանն ասաց. «Գերիներին պահում են Հայաստանում լարվածություն առաջացնելու համար։ Դա տարածքների հետ որևէ կապ չի կարող ունենալ, որովհետև գերիներով չէ, որ տարածքային խնդիր կարող են քննարկել։ Առաջին պատերազմից հետո մենք տևական ժամանակ այդպիսի խնդիրների մեջ ներգրավված էինք, այդ ժամանակ քաղաքական պարտադրանքների լեզվով չէր գնում։ Դա պրոցես էր, որը տևում էր տարիներ»,-նշեց պատգամավորը։
Անդրադառնալով շրջանառվող տեղեկություններին, որ Մեղրին տեղորոշելու համար են նման բան անում, Անդրանիկ Քոչարյանն ասաց. «Շատ բան են խոսում։ Նայեք խոսացողներն ովքեր են, այդ իրենց խոսալու արդյունքում փոկուղի են ստեղծում գերիներին օր առաջ Հայաստան բերելու համար։ Երբ ասում էի՝ գերիների հարցը զգայուն է և պետք է այնպես իրացվի, որ հակառակորդը դա չդարձնի մեր երկրի դեմ քաղաքական գործողությունների թատերաբեմ»,-ասաց պատգամավորը։