ՀՀ ՊՆ-ից հայտարարում են, թե նախարարության մուտքերը փակած անհետ կորած զինծառայողների հարազատները մերժել են հանդիպման առաջարկը։ Հիշեցնենք, որ երեկվանից ծնողները փակել են, շղթայել ՊՆ-ի բոլոր երեք մուտքերը՝ հանդիպում պահանջելով պաշտպանության նախարարի ու ԳՇ պետի հետ։ Նախարարությունից առաջարկել են 5-15 հոգու ընդունել նախարարութան դահլիճում, սակայն ծնողները մերժում են առաջարկը՝ պահանջելով նախարարին և ԳՇ պետին իրենց հանդիպել ՊՆ մուտքի մոտ։
«ՊՆ կողմից բոլոր հնարավոր առաջարկները՝ հանդիպելու, քննարկելու, ինչպես միշտ արվել է, հիմա արվում են, սակայն ի տարբերություն նախորդ անգամների, այս անգամ առաջարկը չգիտես ինչու մերժվում է»,- այս մասին «Փաստինֆո»-ին հայտնեցին ՀՀ ՊՆ-ից։
Նախարարությունում մուտքի մոտ բոլորի հետ հանդիպումը համարում են ոչ կառուցողական, շփման համար դա հարմար ձևաչափ չէ, քանի որ հանդիպումը պետք է լինի դահլիճային պայմաններում, ինչպես ընդունված է ամբողջ աշխարհում։
ՊՆ-ից ասում են նաև, որ նախարարությունն այն կառույցը չէ, որ հարցի միակ պատասխանատուն է, գերիների վերադարձի հարցում վաղուց վերադաս զբաղվող չէ։ Հարցով զբաղվում է ՀՀ փոխվարչապետի գրասենյակը։
ՊՆ-ից մեկնաբանեցին նաև ղեկավարութան՝ ուղղաթիռով նախարարությունից հեռանալը։ Հարցին՝ արդյոք նախարարն ու ԳՇ պետն աշխատավայրում են, պարզաբանեցին.
«Բնականաբար իրենց աշխատավայրում կլինեին…Եթե նույնիսկ որևէ մեկը դուրս է եկել, չեմ կարող ասել, բնականաբար պետք է վերադառնան, որովհետև կատարում են իրենց աշխատանքային պարտականություններն իրենց աշխատավայրում»։
Նույն աղբյուրի փոխանցմամբ՝ նախարարությունը հանդես կգա պաշտոնական հայտարարությամբ։