Ռուսաստանը ամենամեծ միջնորդական դերն է ստանձնել հակամարտության կարգավորման փուլում և գերիների վերադարձը մեր երկու պետությունների այրերի քննարկման ամենագլխավոր հարցերից էր: Այս մասին լրագրողների հետ ճեպազրույցի ընթացքում նկատեց ԱԺ «Իմ քայլը» խմբակցության պատգամավոր Ալեկսեյ Սանդիկովը:
Նա ասաց, որ գերիների հարցը շարունակում է մնալ ՀՀ իշխանությունների օրակարգում:
«Իհարկե մենք հասկանում ենք, որ պրոցեսը բարդ է, քանի որ ադրբեջանական կողմը շարունակում է արհեստական խոչընդոտներ ստեղծել գերիների վերադարձի համար: Ադրբեջանի ղեկավարությունը գերիներին անվանում է դիվերսանտներ և դա խանգարում է եռակողմ համաձայնագրի բոլոր կետերի կատարմանը։ Այս մասին վարչապետը նշել է ՌԴ նախագահի հետ հանդիպմանը: Հուսանք, որ Հայաստանի ջանքերը իրենց արդյունքները կտան»,-նկատեց Սանդիկովը:
Սանդիկովը չպատասխանեց այն հարցին, թե ինչու էին իշխանական մի խումբ պատգամավորներ ասում, որ գերիները կվերադառնան Հայաստան: Պատգամավորը նշեց, որ նա այս հարցում ներգրավված չի եղել:
«Հայաստանում բնակվող բոլոր քաղաքացիները, անկախ իրենց ազգային պատկանելությունից ցանկանում են, որ գերիները օր առաջ Հայաստան վերադառնան: Դա շատ զգայուն թեմա է և պետք չէ այն շահարկել: Բոլոր կողմերն էլ քաղաքական դաշտում շատ են խոսում այս թեմայից և արհեստական օրակարգ են ստեղծում: Կարծում եմ հաշվի առնելով այն փաստը, որ դա շատ զգայուն թեմա է, պետք չէ արհեստական օրակարգ ստեղծել»,- նկատեց նա:
Սանդիկովը շեշտեց, որ պայմանագրի բոլոր կետերը պետք է կատարվեն:
«Ես կարծում եմ, որ ՀՀ իշխանությունները ի վիճակի են վերադարձնել գերիներին, քանի որ դա մեր պետության գերակա խնդիրն է», -ասաց պատգամավորը: