«Լուսավոր Հայաստան» խմբակցության ղեկավար Էդմոն Մարուքյանը ԱԺ քառօրյայի ժամանակ, անդրադառնալով Բաքվում արցախյան պատերազմին նվիրված պուրակի վերաբերյալ հայտարարություններին, նշեց, որ խորհրդարանի նիստը բացվեց այդ պահվածքը դատապարտող ելույթներով, սակայն պետք է գործ անել, ոչ թե հայերենով հայկական ամբիոններից հայտարարություններ անել։
«Մեզ ի՞նչ է թվում, որ մենք մեր խորհրդարանում դատափետող ելույթներ ենք ունենում ու դա մեծ ազդեցությո՞ւն է ունենում Ադրբեջանի վրա: Իրենք նայելու են, ասեն՝ «մի հատ պուրակ բացեցինք, մի ամբողջ երկիր խառնվել ա իրար»: Իսկ ի՞նչ ենք անում, որ էդ պուրակները չբացվեն: Ձեր էսօրվա և վերջին երկու ամսվա հայտարարությունները իրար հետ բռնու՞մ են՝ չեն բռնում: Ո՞ւր ա մեր ԱԳՆ հայտարարությունը: Ձեզ թվում է, որ դուք հայերենով այստեղ Ալիևին «շան տուր» եք տալիս, դա ինչ-որ ազդեցությո՞ւն ունի աշխարհի վրա, աշխարհը նստած հետևում ա մեր պառլամենտի նիստին և խնդրե՞լ է սինքրոն թարգմանել, որ մեր ելույթները լսի: Բա միջազգային դիվանագիտական աշխատանքն ո՞ւր ա»,-նշեց Մարուքյանը։
Պատգամավորը նշեց՝ աշխարհը պետք է տեսնի, թե ինչ այլանդակ ղեկավարության հետ գործ ունի Հարավային Կովկասի տարածաշրջանը, ինչ արհավիրք է թուրք-ադրբեջանական տանդեմը: