Ասել, որ մենք հրաժարվում ենք վերականգնել նախկին ԼՂԻՄ սահմանները, իրականությունից դուրս է։ ԱԺ-ում լրագրողների հետ զրույցի ժամանակ այս մասին ասաց «Իմ քայլը» խմբակցության պատգամավոր Տաթևիկ Հայրապետյանը։
Անդրադառնալով հարցին՝ արդյոք մեզ համար հակամարտությունն այս արդյունքներով կարո՞ղ է լուծված համարվել, թե ոչ, պատգամավորը նկատեց՝ վարչապետն արդեն հայտարարել է հակամարտության չլուծված լինելու մասին, քանի որ չկա կարգավիճակի հարց։
Դիտարկմանը, որ վարչապետը Շուշիի հայկականությունը կասկածի տակ էր դնում, Տաթևիկ Հայրապետյանը հորդորեց չմտնել մանիպուլյացիաների դաշտ. «Ո՛չ Շուշիի, ո՛չ Քարվաճառի հայկականությունը որևէ մեկը չի կարող հարցականի տակ դնել, որովհետև կա մշակութային ժառանգություն, որն այսօր Ադրբեջանն ամեն գնով ուզում է վերացնել։ Անկախ որևէ մեկնաբանությունից, դա երբևէ չի կարող հարցականի տակ դրվել»,-ասաց պատգամավորը։
Հարցին՝ ինչու՞ գերիների հարցը չի լուծվում, Տաթևիկ Հայրապետյանը նկատեց՝ գերիների հարցն Ադրբեջանի համար շահարկելու լավ թեմա է. «Ադրբեջանական կողմը ԵԽԽՎ-ում ունեցած քննարկումների ժամանակ հստակ ցույց տվեց, որ շատ դեստրուկտիվ է տրամադրված և դա նույնիսկ եվրոպացիների համար ակնհայտ դարձավ, երբ փորձում էին գերիներին որակել որպես ահաբեկիչներ։ Դա կոշտ գնահատականների արժանացավ նաև եվրոպացի գործընկերների կողմից։ Ադրբեջանը փորձելու է այս հարցով մաքսիմալ ցավեցնել մեզ և փորձել անընդհատ մեր ներքաղաքական կյանքում շահարկումների հիմք դարձնել։ Ադրբեջանի նպատակները շատ բազմաթիվ կարող են լինել։ Խնդիրն այն է, թե մենք ինչ նպատակներ ենք մեր առջև դնում և ինչպես ենք առաջ շարժվում։ Ադրբեջանի համար հայ գերիներին պահելը պետք է միջազգային գլխացավանք դառնա, և մենք ամեն կերպ դրա ուղղությամբ պետք է աշխատենք։ Հասկանում եմ, որ այդ իրավիճակն անմարդկային է և դժվար է դրա հետ կապված հստակ հայտարարություններ անել, բայց Ադրբեջանն այդ հարցը քաղաքականացնում է։ Մեր խնդիրն է դուրս բերել դա քաղաքականությունից»,-ասաց Տաթևիկ Հայրապետյանը։