Պարտադիր ժամկետային զինծառայողների ծնողները Նիկոլ Փաշինյանի հետ հանդիպում են պահանջում։ Ծնողներից մեկը լրագրողների հետ զրույցում նշեց, որ պատերազմն անցել է, այդ երեխեքը մոռացվել են բոլորի կողմից, մնացել են միայն ծնողները։ Իսկ թե ովքեր պետք է փոխարինեն զինծառայողներին՝ ծնողը նշեց, թե դա իրենց խնդիրը չէ, դա նախարարությունը պետք է որոշի։ Վերջինս նշեց, թե վարչապետի վերաբերմունքը միշտ եղել է կառուցողական, ուղղակի այն գերատեսչությունները, որոնք պետք է համապատասխան իրենց համաձայնությունը տան, զլանում են։
«Ես չգիտեմ որն է նպատակը, երևի մտածում են այդ երեխեքը շատ բան ունեն ասելու, չեն ուզում, որ էստեղ լսվի, իրենց ձեռնտու չի լինելու կամ չեն ցանկանում գլխացավանքի մեջ մտնել։ Այդ դեպքում թող ծառայությունը սարքեն 5 տարի »,- նշեց նա՝ հավելելով, որ հայրենիքին ծառայությունը պետք է մատուցեն բոլորը, բայց այդ երեխեքի ծառայությունն արդեն գերկատարվել է։
«Դուք կարծում եք, որ խաղաղ պայմաններում և այս պայմաններում ծառայությունը նույն նժարին պետք է դնել։ Իմ երեխան 44 օր պատերազմ է անցել, մինչև հիմա չի հանել համազգեստը, համազգեստով քնում ու արթնանում է»,- նշեց նա։