Բացառվում է այն տեսակետը, որ գերիներին վերադարձնելու պատասխանատվությունը ռուսական կողմինն է։ Մենք որպես պետություն իրավունք չունենք մտածել, որ մեր հայրենակիցների հարցով կարող է օտար պետություն զբաղվել։ Խորհրդարանում լրագրողների հետ զրույցի ժամանակ ասաց ԱՀ նախագահի հատուկ ներկայացուցիչ Բորիս Ավագյանը՝ անդրադառնալով դիտարկմանը, որ իշխանական պատգամավորները կարծիքներ են արտահայտում, թե գերիների հարցը կարող է լուծվել ՌԴ նախագահի մեկ զանգով։
Բորիս Ավագյանը նկատեց՝ ռուսական կողմը միջնորդ է, որն օգնել է կանգնեցնել պատերազմական գործողությունները։ Վերջինս ընդգծեց, որ մենք ենք պատասխանատու մեր հայրենակիցների համար. «Ռուսաստանը հնարավոր չափով մեզ աջակցում է, բայց նա պատասխանատվություն չի կրում։ Տեսել ե՞ք փաստաթուղթ, որ ՌԴ-ն երաշխավորում է, որ ադրբեջանական կողմն իր բոլոր պարտականությունները կատարելու է»,-ասաց Բորիս Ավագյանը։
Անդրադառնալով ականազերծման կենտրոնի կողմից Արցախում իրականացված լրտեսական գործունեությանը՝ Բորիս Ավագյանն ասաց, որ քրեական գործ է հարուցվել և քննությունն ընթանում է. «Հիմա ականազերծման գործընթացով զբաղվում են ռուս խաղաղապահ ուժերը»։