Չեմ կարծում, որ Բորիս Ավագյանը որևէ աղմկահարույց հայտարարություն է արել։ ԱԺ շենքից դուրս գալիս նրան զանգեցին ու տեղեկացրեցին, որ Արայիկ Հարությունյանն ուզում է աշխատանքից ազատել։ Լրագրողների հետ զրույցի ժամանակ այս մասին ասաց ԱԺ անկախ պատգամավոր Վարդան Աթաբեկյանը։
«Ինձ համար դա անթույլատրելի երևույթ է, որովհետև դրանով հարվածում են Հայաստանի ԱԺ ինստիտուտին։ Նախ մամուլում հրապարակեցին, որ նա փոխտնօրեն չի հանդիսանում։ Ստացվում է՝ ԱԺ պատգամավորները չեն հասկանում, թե ում են կանչում աշխատանքային քննարկման։ Չեմ հասկանում՝ ինչ են ուզում դրանով կանխել։ Մենք հանդիպել ենք գերիների հարցը քննարկելու համար, եթե դուք Բորիս Ավագյանին աշխատանքից ազատում եք, ի՞նչ եք ուզում կանխել, որ այդ աշխատանքային խումբը չստեղծվի՞, գերիներով հարցով չզբաղվե՞ն»,-ասաց պատգամավորը։
Վարդան Աթաբեկյանն ասաց, որ այսօր Բորիս Ավագյանը կրկին խորհրդարան է եկել, որպեսզի քննարկեն ու հասկանան՝ հնարավորություն ունեն շարունակելու աշխատանքները։
«Երեկ սրճարանում իմ ներկայությամբ են եկել Բորիս Ավագյանից համազգեստը, զենքը վերցրել։ Նա դեռ հրամանը չի տեսել, չի ստորագրել։
Երևի ոնց գալիս զենքն են տանում, այնպես էլ հրամանը կբերեն։ Բորիս Ավագյանը սպասում է իր հրամանին ծանոթանա, որ հասկանա ինչ հայտարարություն անի»,-ասաց պատգամավորը։