Գյումրիում երեկ սպանություն է տեղի ունեցել։ Շիրակացի փողոցի տներից մեկում 65 տարեկան կին է սպանվել։ ՀՀ գլխավոր դատախազության Հանրային կապերի բաժնից հաստատեցին տեղեկությունը՝ նշելով, որ նախնական տեղեկությունների համաձայն՝ կինը ժամը 20։00-ի սահմաններում հարևանի տուն հյուր է գնացել, իսկ վերջինիս հետևից նույն բնակարան է գնացել ամուսինը։
Նախնական տեղեկություններով՝ տղամարդը եղել է բարկացած, ոգելից խմիչքի ազդեցության տակ, հարևանի տանը կենցաղային հարցի շուրջ վիճաբանել է կնոջ հետ, դանակով հարվածել է որովայնի ու կրծքավանդակի հատվածին, պատճառել կրծքավանդակի ձախ կեսի կտրած-ծակած, որովայնի էպիգաստրալ շրջանի կտրած-ծակած վերքեր։ Կնոջ կենսաբանական մահը գրանցվել է «Գյումրի» ԲԿ-ում։
Դատախազությունից հայտնեցին, որ դեպքի առթիվ հարուցվել է քրեական գործ՝ ՀՀ քրեական օրենսգրքի 104-րդ հոդվածի 1-ին մասի հատկանիշներով՝ սպանության համար։ Սպանություն կատարելու կասկածանքով երեկ ժամը 21։30-ին ձերբակալվել է կնոջ ամուսինը, հայտնաբերվել է նաև հանցագործության գործիքը։