Տնտեսության վերականգնման հերթական ազդակն ենք ստացել և ըստ էության կարող ենք արձանագրել, որ 2021 թվականի մարտին աշխատատեղերի թվի աճ ենք ունեցել։ Այս մասին կառավարության նիստի մեկնարկին ասաց ՀՀ վարչապետ Նիկոլ Փաշինյանը։
ՊԵԿ նախագահ Էդվարդ Հովհաննիսյանն ասաց, որ ամփոփել են 2021-ի մարտ ամսվա աշխատատեղերի վերաբերյալ տեղեկությունները. «Նախորդ տարվա համեմատ զրոյից բարձր վարձատրվող աշխատատեղերն ավելացել են 2500-ով։ Համեմատական վերլուծություններ են իրականացվել նաև 2019-ի հետ։ 2019-ի մարտի համեմատ աշխատատեղերի քանակն ավել է 38 հազարավո։ Հարկման բազան կազմել է 131 մլրդ և այդ ցուցանիշը 2020-ի համեմատ 7.5 միլիարդով է ավել, իսկ 2019-ի համեմատ՝ 24 միլիարդով։ Միջին աշխատավարձը կազմել է 211 հազար, որը 2020թ.-ի նկատմամբ 12 հազարով է ավել, իսկ 2019-ի նկատմամբ՝ շուրջ 28 հազարով»,-ասաց ՊԵԿ նախագահը։
Վարչապետը հետաքրքրվեց՝ այդ աշխատատեղերը նոր բացվա՞ծ են, թե՞ ստվերից են դուրս եկել, Էդվարդ Հովհաննիսյանն ասաց, որ որոշակի վերլուծություն են իրականացրել և այդ զանգվածի մեջ կան ինչպես ստվերից դուրս եկած աշխատատեղեր, այնպես էլ նոր ստեղծված մաս. «Ստվերի հատվածը բավականին մեծ է, քանի որ ունենք կոնկրետ հսկողական աշխատանքներ, որտեղ թվային պատկերները հստակ են»,-նշեց Էդվարդ Հովհաննիսյանը։