Պաշտոնական Երևանի դիրքորոշումը մնում է նույնը, որ Թուրքիայի հետ հարաբերությունների կարգավորման գործընթաց պատրաստ ենք սկսել՝ առանց որևէ նախապայմանների։ Այսօրվա դրությամբ՝ նախապայմանները ներկայացվում են միայն թուրքական կողմից։ Այս մասին լրագրողների հետ զրույցում ասաց ԱԳ փոխնախարար Ավետ Ադոնցը։
Ինչ վերաբերում է նախապայմաններին, ապա վերջինս հայտնեց, որ դրանք հիմնականում վերաբերում են Ցեղասպանության ճանաչմանը և տարածաշրջանային խնդիրներին։ Նրա խոսքով՝ ներկայիս դրությամբ որևէ երկխոսություն՝ Հայաստանի Հանրապետության և Թուրքիայի միջև չկա։ Անդրադառնալով 44-օրյա պատերազմից հետո տարածաշրջանում առաջարկվող 3+3 ձևաչափին՝ փոխնախարարը նշեց, որ այսօրվա դրությամբ՝ այն, ինչ վերաբերում է Արցախյան հիմնախնդրին և ԼՂ հակամարտության կարգավորմանը, ապա Մինսկի խմբից և համանախագահությունից բացի որևէ այլ ձևաչափ մենք չենք քննարկում։
Դիտարկմանը, որ չենք տեսնում աշխատանքներ՝ Մինսկի խմբի համանախագահության հետ, փոխնախարարն արձագանքեց՝ նշելով, որ աշխատանքներ կան և հույս հայտնեց, որ դրանք շուտով կլինեն տեսանելի։ Ինչ վերաբերում է թշնամական երկրների հետ կեցվածքը փոխելուն ուղղված քայլերին, ապա Ադոնցը նշեց, որ արվում է այն, ինչ արվում է, մասնավորապես, ԱԳՆ օրակարգը բաց է։
«Իհարկե կան սեգմենտներ, որոնք վերաբերում են դասական դիվանագիտությանը և որևէ ձևով ներսի շրջանակներից դուրս չեն գալիս, բայց այն, ինչ արվում է, դուք տեսնում եք»,- նշեց նա՝ հավելելով, որ Թուրքիայի վերաբերյալ միակ մեսիջը հետևյալն է՝ համաձայն ենք, բայց որևէ նախապայման ընդունելի չէ մեզ համար։
Անդրադառնալով հարցին, թե ինչ կտա մեզ, եթե ԱՄՆ նախագահ Բայդենի կողմից արտասանվի, փոխնախարարը նշեց, որ դա շատ կարևոր քայլ կլինի, եթե նշվի և ևս մեկ անգամ Ամերիկան կհաստատի իր մոտեցումները՝ ոչ թե մեր տարածաշրջանային հարցերի կարգավորման վերաբերյալ, այլ՝ ընդհանրապես, թե ինչպես են ֆունդամենտալ արժեքները, մարդու ազատություններն արժևորվում ԱՄՆ-ում։