Կառավարության այսօրվա նիստում գործադիրը հավանություն տվեց հարկային օրենսգրքում լրացումներ կատարելու և հարակից օրենքներում փոփոխությունների նախագծերի փաթեթին։
ՀՀ ֆինանսների նախարարի պաշտոնակատար Ատոմ Ջանջուղազյանն ասաց, որ նախագծի նպատակը Հայաստանում ավտոմեքենաների շուկայում Trade-in համակարգի ներդրման համար անհրաժեշտ հարկային միջավայր ձևավորելն է։
«Ավտոմոբիլներ արտադրողների պաշտոնական ներկայացուցիչների ասոցիացիան արձանագրել է, որ մեր հարկային համակարգում եղած կարգավորումները ոչ միայն չեն նպաստում Trade-in համակարգի իրացմանը, այլ խոչընդոտում են։ Մասնավորապես ավելացված արժեքի հարկի բազայի հաշվարկման տեսակետից գործող կարգավորմամբ, երբ ֆիզիկական անձը վաճառում է իր ավտոմեքենան ընդհանուր հարկման համակարգում գործող կազմակերպությանը՝ հաշվի առնելով, որ ֆիզիկական անձն ԱԱՀ վճարող չէ, այդ կազմակերպության մոտ պարտավորություն է առաջանում ամբողջ արժեքի չափով, ինչը խոչընդոտում է այս համակարգի կայացմանը»,-նշեց Ատոմ Ջանջուղազյանը։
ՀՀ վարչապետի պաշտոնակատար Նիկոլ Փաշինյանը նշեց, որ խոսքն օգտագործված ավտոմեքենաները նորով փոխարինելու համակարգի մասին է.
«Աշխարհում լայնորեն տարածված է, որ մարդիկ իրենց մեքենաները հանձնում են և որոշակի գործարքի արդյունքում ստանում են նոր ավտոմեքենա։ Ուսումնասիրությունների արդյունքում այն եզրակացությանն ենք եկել, որ գործող հարկային համակարգն այս գործընթացի համար նպաստավոր չէ և ֆինանսական լրացուցիչ խոչընդոտներ է ստեղծում»,-ասաց Փաշինյանը՝ հավելելով, որ այս փոփոխություններով փորձում են նպաստել գործընթացին, որպեսզի երկրում ավտոմեքենաների պարկը թարմանա և քաղաքացիների համար ավելի հեշտ լինի հին ավտոմեքենան նորով փոխարինել։