Ինչպե՞ս կարող ենք ասել՝ այս պահին անվտանգ է, եթե դեռ դելիմիտացիա չունենք, դեմարկացիա չունենք, պայմանագիր չունենք՝ սահմանի վերաբերյալ։ Ասել, որ միջադեպերը կանխված են և կկանխվեն՝ ֆանտաստիկայի ժանրից է։ Ծառայություն է իրականացվում, որ կանխվի։ Այս մասին լրագրողների հետ զրույցում ասաց ԱԱԾ տնօրենի տեղակալ Ստեփան Մելքոնյանը՝ անդրադառնալով Սյունիքի մարզում տիրող իրավիճակին։
Ինչ վերաբերում է չեզոք գոտուն, Մելքոնյանը նշեց, որ այդ կիլոմետրանոց շերտն ամեն պետություն իր տարածքի հաշվին է անում, հարևան տարածքի հաշվին՝ այդ շերտը չեն կառուցում։
«Նրանք իրենց տարածքում պետք է անեն, մենք՝ մեր։ Օրինակ՝ Թուրքիայի սահմանում մենք ունենք շերտ, որը, բնականաբար մեր տարածքի հաշվին է, հո հարևան տարածքի հաշվի՞ն չէ»,- նշեց նա։
Հարցին՝ արդյոք կարծում է, որ թշնամու կողմից գործողություններն ընդամենը չհստակեցված սահմանային գոտու պատճառով է, Մելքոնյանը պատասխանեց. «Առայժմ դեռ նոր է ավարտվել պատերազմը, դեռ չկա պայմանագիր՝ հարևան երկրի հետ»։
Հարցին՝ ինչ պայմանագրի մասին է խոսքը, արդյոք նոր պայմանագիր է սպասվում. «Ոչ։ Մենք ունե՞նք Վրաստանի հետ պայմանագիր։ Դուք ռազմաքաղաքական իրավիճակից բխող հարցեր եք տալիս, որը մեկ օրվա մեջ չի լուծվում»։
Նրա խոսքով՝ չենք կարող ասել, որ ռազմաքաղաքական իրավիճակն այդ հատվածում հանգիստ է, ռիսկեր չի պարունակում։
Մելքոնյանը նշեց, որ ոչ միայն Սյունիքի հատվածում, այլ՝ ամբողջ բնագծով դեռ դիրքավորված են և՛ մեր կողմից պաշտպանական զորքերը, և՛ նրանց կողմից, բնագիծը դեռ վերջնական կարգավորված չէ։
«Այսօր ունենք 520 կմ բնագիծ, որն ուղղակի դիրքավորված ինչպես կա, այնպես՝ կանք, բայց դրա վերաբերյալ երկու պետությունների մեջ ժամանակի ընթացքում, երբ արդեն ռազմաքաղաքական իրավիճակը կհանդարտվի, հնարավորություն կստեղծվի՝ երկկողմանի հանձնաժողովներ ստեղծել, հարցը քննարկման առարկա դարձնել, կմոտենանք արդեն դելիմիտացիային, դեմարկացիային, այդ ժամանակ արդեն հստակ կլինի մեր սահմանը, սահմանի հետ կապված այդ սահմանային ինժեներական կառույցները»,- նշեց նա։